NLW MS. Peniarth 32 (Y Llyfr Teg) – page 178
Llyfr Iorwerth
178
1
teruyn; breint. a phriodolder. a chynwarchadỽ.
2
Ny eiỻ dim a vo is y vreint no|r rei hynny ter+
3
uynu arnadunt ỽy. Kyhyt a hynn y dylyir
4
gỽarchadỽ coet cadỽ; o wyl Jeuan yd|a y moch
5
y|r coet. hyt y pymthecuet dyd gỽedy y kalan.
6
yn hynny o amser y dylyir ỻad messobren.
7
O|r keiff dyn moch araỻ yn|y goet; kynny
8
chaffei namyn tri ỻydyn. ereiỻ a|dyweit
9
panyỽ o|r|dec|ỻydyn. Kyfreith. yỽ o|r tri. ỻỽdyn. a|r
10
gyt·uot yỽ o|r dec ỻydyn. a|r moch hagen a
11
dylyant bot yn|y coet yn hynny o amser
12
gỽedy ỻadher messobyr onadunt. Tri gỽ+
13
arthrud kelein; un onadunt yỽ pan ladher
14
y gelein. drychaf a gossot arnei. Eil yỽ y
15
hyspeilaỽ. Trydyd yỽ; y gỽan a throet pan
16
ovynher y chystlỽn. a|r rei hynny yssyd gym+
17
eint a|e sarhaet; dyeithyr na drychefir. Ereiỻ
18
a|e geilỽ yn teir sarhaet kelein. Tri dygyngoỻ
19
kenedyl; O|deruyd y vab amheu gỽneuthur kyf ̷+
20
lauan. ac am y gyflauan honno keissaỽ y wadu
21
ac ny wadỽyt kynno hynny. ny at kyfreith. y wadu;
22
yny diwycco y genedyl y gyflauan drostaỽ.
23
Eil yỽ; o|deruyd ỻad mab amheu diodefedic.
24
ac na ry|gymerer; ny thelir y alanas. Sef a ̷+
25
chaỽs yỽ; kanny chymerassant ỽy efo yn|y
26
vywyt yn|kyfreithaỽl; na|dylyant ỽynteu kaffel dim
| « p 177 | p 179 » |