NLW MS. Peniarth 32 (Y Llyfr Teg) – page 261
Brut y Saeson
261
a|delit y gan tyỽyssaỽc austrie Ac y prynỽyt yr
diruaỽr sỽmp o aryant. Ac yn|y diued y brathỽyt
o ergyt gỽenỽynic vrth gasteỻ Calus a gỽedy
y anobeithaỽ ef a rodes y deyrnas y Jeuan y|ỽraỽt.
A thrayan y sỽỻt y Joto y nei y deudecuet vlỽdyn
o|e deyrnas y bu varỽ. Ac yn fynaỽn eurart
y cladỽyt dan draet y dat. [ Vn vlỽdyn eisseu
o deu Cant. a. Mil. oed. oet. crist pan ỽledychaỽd Jeuan vab
henri vab yr amherodres hỽnnỽ a vỽryaỽd. arthur
Jeuanch*. y|nei yn auon sein. Ac a|ettelis elianor
y chỽaer yn|y geidỽadayth ef. a henri y vab. Ac
am vot arthur yn etiued ar laỽer o dired yn
teyrnas freinc vrth hynny y gỽẏssaỽd phylip vrenhin
freinc Jeuan y|ỽ lys y atteb. Ac am na doyth y|duc
arnaỽ normandi. y hỽnnỽ y bu deu vab a their
merchet kyntaf vu henri a|r eil vu Ricart a vu
vrenhin yn yr almayn. Kyntaf o|r merchet
oed Jsobel a vu vreic y vrederic amherodyr ruffein.
yr eil vu Elianor gỽreic Simon Monffort
Y drydyd vu siỽan gỽreic ỻywelyn vab Joruerth
tyỽyssaỽc kẏmrẏ. yr henri hỽnnỽ a oresgyn ̷ ̷+
naỽd Jỽerdon. ac yn|y amser ef y gỽahardỽyt
ỻoeger y gan Jnnocens bab am nat erbynei ef
stephan archescob Keint gỽedy y ethol a|e|gadyr* ̷ ̷+
haỽ yn gyfreithaỽl. ac y bu anundeb y·rygtaỽ
a gỽyrda ỻoeger. Ac y doyth loỽẏs y mab hẏnaf
| « p 260 | p 262 » |