NLW MS. Peniarth 45 – page 138
Brut y Brenhinoedd
138
1
dỽys yn agos y caer caradaỽc yn lle a elwir sal+
2
sburi y myỽn mynwent ger llaỽ manachloc am+
3
bri abbat y gỽr a seilỽys y uanachloc honno yn
4
gyntaf. Ac ny dothoed gan y bryttanneit yr dad+
5
leu hỽnnỽ un aryf Canyt oed yn eu bryt na+
6
myn gỽneuthur tangnheued. Ac ny thebyg+
7
ynt wynteu bot ym bryt y saesson amgen no
8
hynny. Ac y doethant wynteu y bratwyr tỽyll+
9
wyr yn aruaỽc. Ac eissoes y kerric a uu am+
10
diffyn iaỽnda yr bryttanneit. rac y llad yn holl+
11
AC yno yr dothoed Eidol iarll [ aỽl. ~ ~
12
caer gloeỽ. Ac y cauas hỽnnỽ paỽl da cadarn
13
ac ar paỽl hỽnnỽ y briwei ef emenhyd y saes+
14
son ac y hanuonei partha* ac uffern. Ac ny
15
orffỽyssỽys eidol ar ruthur honno yny llad+
16
aỽd. dengwyr a|thrugeint ar un paỽl hỽnnỽ. ~
17
Ac gwedy na allei ef e hunan ỽrthỽynebu yr
18
niuer hỽnnỽ. ffo a|wnaeth yny doeth y dinas
19
e hun. A|llawer a syrthỽys o bob parth. Ac eisso+
20
es yr ysgymun uudugolaeth honno a gauas
21
y saesson. Ac er hynny ny ladassant hỽy Gorth+
22
eyrn namyn y carcharu a chymell arnaỽ rodi
23
udunt y dinassoed ar kestyll cadarn dros vyn+
24
eb yr ynys yr y ellỽng. Ac y rodes ef pob peth yr
25
y ellỽng udunt o|r a uynyssont. Nyt amgen llun+
26
dein. A chaer efraỽc. A lincol. A chaer wynt gan
27
lad y pobyl megys y lladei bleideu y deueit gỽe+
28
dy y hadaỽhei eu bugeil. Ac gỽedy kymryt
| « p 137 | p 139 » |