Cambridge Trinity College MS. O.7.1 – page 42r
Llyfr Blegywryd
42r
y neskir gỽarthec dy·uach y eu talu
dros alanas ac y dylyir mechni dros+
tunt. Ac or mod hỽn. os mab yr alltut
o wreic honno a lad dyn. kenedyl y
vam a tal yr alanas. canyt oes keny+
dyl yr alltut y galler galanas arnunt
na dial. Or tyrr llog ar tir escob deu
hanher uyd yr ennill rỽg y brenhin
ar escob. Os tir y brenhin y tyrr; y bren+
hin e hunan bieiuyd yr ennill. Beth
bynhac a uyrho mor gymlaỽd yr tir
megys torri llog y brenhin bieiuyd.
Pỽy bynhac a omedho sefyll ỽrt* gyfreith
yn|y llys yg|gỽyd y brenhin; anreith
odef uyd. Eil dyn anreith odef yssyd;
flemaỽr. Trydyd yỽ dyn a latho kelein
kywlat ac ef. Pỽy bynhac a torro not
ar ffin rỽg deu tir. neu dỽy tref. talet
gamlỽrỽ yr brenhin. A phedeir kein+
haỽc. kyfreith. yr perchen. A gỽnaet y not
mal y bu. Os auon a uyd not rỽg
tired deu dyn. A dygỽydaỽ derwen ar
traỽs yr auon; perchen y tir y tyfho
y pren o·honaỽ bieiuyd y pren ac a per+
| « p 41v | p 42v » |