BL Additional MS. 19,709 – page 19v

ryv ran o|r ynys y·gyt ac vynteu. ny dywavt ynteu na rodei

ef hi y ỽr ny hanfei o|r ynys o|damweinei y|r kyfryỽ vr hvnỽ

y herchi heb ar·gyfreu genti. hyn hefẏt a gadarnhaei hyt

na lafuryei y geissav gvr idi megys y ỻeiỻ. Canys mỽẏ

y karyssei ef hihi no|r ỻeiỻ. a|hitheu yn|y tremygu ef yn vỽẏ

no|r ỻeiỻ. a heb ohirr* o gyt·gygor y|wyrda y|rodes y dỽy verchet

hynaf idav y tywyssogyon yr alban a chernyv. a hanner y

gyfoeth idaỽ gantunt hyt tra uei vyv ef. a gvedy bei varv

y|kyuoeth yn gvbyl udunt vynteu yn deu haner. ac yna gve+

dy clybot o aganipus vrenhin freinc. clybot clot a|phryt a theg+

vch cordeiỻa. anuon kenadeu a|wnaeth o|e herchi yn|wreic i+

dav. a|dywedut vrth y|that y|genatvri. ac y|dẏwavt ynteu  ̷

y|rodei y verch idav ef heb argyfreu can daroed idav rodi

y gyuoeth a|e eur a|e aryant gan y dvy verchet y|ỻeiỻ. a

phan gigleu aganipus tecket y vorvyn a|e|thelediwet kyfla+

vn vu o|e charyat a dywedut a wnaeth bot idav ef digaỽn

o eur ˄ac aryant. ac nat oed reit idav ef vrth dim namyn gv+

reic telediv dylyedavc y|kaffei blant ohonei yn etiued ar y

gyfoeth. ac yn dianot y|kadarnhavyt y briodas y·rydunt.

A c ym pen yspeit yg kylch diwed oes lyr y goresgynvẏs

ẏ dofyon arnav y|gyfoeth a gynhalassei ef yn vravl drvẏ

hir amser. ac y ranassant y·rygtunt yn deu haner. ac o

gymodloned y|kymerth maglavn tẏwyssaỽc yr alban lyr at+

taỽ a deugein marchaỽc ygyt ac ef rac bot yn gewilyd gantav

bot heb varchogyon ỽrth y oscord. a oscord. a gỽedy bot ỻyr yn|y wed

honno y·gyt a|maglaỽn blyghau a|oruc goroniỻa rac meint

a oed o varchogyon gyt ac ef. ac rac eu gỽasanaeth·wyr ỽyn+

teu yn teruysgu y|ỻys. a|dywedut a|wnaeth ỽrth y gỽr bot