Cardiff MS. 3.242 (Hafod 16) – page 65
Campau'r Cennin
65
gyweda y tosted arnaỽ. a da yỽ rac chỽydu gỽaet. a da
yỽ y berwi myỽn gỽin a mel ygyt y beri gostỽng hỽ+
yd bolwyst. a da yỽ morteru y deil yn van a|e dodi ar
lygat rac asgen. a|da yỽ y sud y|dodi yn|y clusteu gỽedy
bo claf dyn. a da yỽ y bỽdyr a mel gỽedy berwi rac y
pessychu heb aỻel|kyrhaedu onyt yn anhaỽd. ac rac
llawer o glỽyfeu y kyỻa. ac y|r|neb a|e hyfo myỽn dỽfyr
rac y cryt. neu y berỽi a|rut yn ogymeint y weỻau go+
lỽc. Ef a|dywaỽt Pulmus gỽr doeth o|r geluydyt honn.
pei dottit het o|r betton am vynỽgyl am vynỽgyl nei ̷+
dyr mae kynt y bydei varỽ noc yd|aei|drosti. Y|neb a ̷
vynno karthu y gyỻa; kymeret hanner ỽns o bỽdyr
o|wreid y beton. a sugyr myỽn dỽfyr ac yfet ac ef a vỽ+
rỽ a|vo o drỽc yn|y gyỻa. Fenigyl; yssyd wressaỽc a
sych yn|yr eil rad. da yỽ rac gỽenỽyn y|verỽi myỽn gỽin a|e
yfet. a da yỽ eu sud yghymysc a mel y|vỽrỽ myỽn ỻyge+
it a vo tywyỻ eu|golỽc. Da yỽ sud hat y|ffenigyl y
gymysgu a gỽin a mel rac pob heint ỻygeit. Da yỽ
sud y ffenigyl myỽn clusteu o|e mynych iraỽ ac ef. Da
yỽ eu gỽreid y berwi myỽn gỽin ar|les yr arenneu.
Ros yssyd oer a sych yn|y rad gyntaf. a|da yỽ eu pỽdyr
y|vỽrỽ ar|y|ỻe yd ennynno tan uffernaỽl. ac y|r kyỻa neu
y|r gaỻonn a|vo yn ỻosgi gyt a gỽin y dodi arnaỽ yn blastyr.
Da yỽ sud y ros a|gỽin y lygeit tywyỻ. Da yỽ pỽdyr o
ros a|mel rac heint gỽressoc yng|geneu dyn. neu y neb
a gymero blodeu ros yn leisson a|e berỽi myỽn oleỽ o+
liwyd. a hỽnnỽ a|elwir oel rosat. ac yssyd da rac ỻawer
| « p 64 | p 66 » |