Oxford Jesus College MS. 57 – page 140
Llyfr Blegywryd
140
rynyon y|r neuad a|r ystaueỻ. kyflet pob torth
ac o|elin hyt ardỽrn. kyn|dewet ac na phlyckont
pan dafler* herwyd eu hymyl. neu ynteu yn
gyn|dewet a|deu|vys. ac o|r bragaỽt kymeint a
cherỽyneit gỽryf. ac ugein yscub o geirch un
rỽym. a cheinyaỽc y|r gỽassanaethwyr. ac
veỻy y telir y gae˄af o vileindref. ac o·ny cheffir
hỽch. risgen emenyn drostaỽ. teir dyrnued o
let a their o dewder heb voel arnei. Chwech
daỽn·bỽyt. a|cherỽyneit gỽryf o naỽ rychw+
ant ar wyr. o galan gaeaf hyt galan mei a
delir. Messur daỽn·bỽyt yỽ. backỽn tri·byssic.
yn|y hysgỽydeu ac yn|y heis. ac yn|y chlunyeu.
neu hỽch deirblỽyd vehineit. ac nyt oes ues+
sur am y|mehin. neu lestreit emenyn o deir
dyrnued o let. a|their o dyfynder. kic ych a
delir dros dir daỽn·bỽyt y gaeaf. Ny thelir
dros daỽn·bỽyt y gỽannỽn namyn aryant.
Ony eỻir eu kaffel deudec keinyaỽc a|delir.
dros bop vn ohonunt. ac ugein yscub o ge+
irch
| « p 139 | p 141 » |