NLW MS. Llanstephan 27 (The Red Book of Talgarth) – page 83v
Ystoria Adda
83v
ymdan y prenn. megys y gaỻei wybot pa veint y tyfei y prenn
yn|y vlỽydyn. ac ueỻy y gỽnaeth hyt ym·penn y deng|mly+
ned ar|hugeint. Gỽedy hynny pan wnaeth dauyd broffwyt y
pechaỽt maỽr. ac yd|oed var duỽ arnaỽ am wreic vri. Ac ual
yd oed yn|dechreu gỽneuthur y benyt y·dan y prenn hỽnnỽ.
Ac yna y goruc ef y miserere. a phan daruu idaỽ wneuthur
y saỻỽyr. Yna y dechreuaỽd ef adeilyat temyl y|r arglỽyd
pump mlyned ar|hu·geint yr madeueint idaỽ o|e bechodeu.
Eissyoes o achaỽs y gyflauan a|beris ef y gỽneuthur. y
dywaỽt duỽ ỽrthaỽ. na|chỽplaei ef weith y demyl. Ac yna
y govynnaỽd dauyd pỽy a|e gỽnaei hitheu. Selyf a|e gỽna heb+
y duỽ. ac yna yr adnabu dauyd na aỻei ef vot yn vyỽ yn
hir. Ac yna y gelwis y wyrda attaỽ. ac y dywaỽt ỽrthunt
bydỽch uvud y selyf vy mab i. kan deryỽ y duỽ y dethol
y|m ỻe i gỽedy mi. a gỽedy marỽ dauyd. selyf a|wledychaỽd
yn|yr Jndia. ac a|gỽplaaỽd temyl yr arglỽyd yn|y decuet
vlỽydyn ar|hugeint trỽy lewenyd maỽr. Eissyoes cỽplaỽ gỽ+
eith y demyl yr hoỻ seyri ny|s|geỻynt. kany cheffynt vn
prenn digaỽn y hyt yn hoỻ goedyd libani y wneuthur y
windis. Ac yna ỽrth vaỽr anghenreit y torryssant ỽy y
rac·dywededic brenn hỽnnỽ. ac y gỽnaethant y windis o+
honaỽ. a|dec kupyt ar|hugeint oed y uchder herỽyd y mes+
sur a|oed ganthunt. A phan|gyuodent y prenn y vyny a|e
ossot megys y dylyei. byrrach|oed noc yd oed gynt o vn ku+
pyt. ac ueỻy y profet teirgweith. ac y kahat o gupyt yn
vyrrach bop gỽeith. ac o|r achaỽs hỽnnỽ y bu ovyn maỽr ar
y seyri. ac y managassant hynny y|r brenhin. ac ual y gỽeles
| « p 83r | p 84r » |