NLW MS. 3036 (Mostyn 117) – page 4
Brut y Brenhinoedd
4
lladaỽd ef y tat. A guedy marỽ y tat o|r ergyt hỽn ̷+
nỽ; y deholes guyr yr eidyal brutus. kanyt oed te+
ilỽg gantunt kymryt yn vrenhin arnadunt
gỽr a wnelei kyflauan kymeint a llad y vam a|e
tat. A guedy y| dehol; yd aeth ynteu hyt y|groec
ac y guelas yno guelygord o etiued elenus vab
priaf yg keithiwet y dan pandrasius vrenhin
groec. Pir vab achyl a dugassei y| genedyl honno
gantaỽ guedy distryỽ tro yn dial y tat. Ac a|e guar+
chaessei ỽynt yg keithiwet yn gyt a hynny o am+
ser. Ac yna guedy guelet o vrutus y| genedyl. trygy+
aỽ a oruc gyt ac ỽynt. Ac yn| y lle guedy kyneui+
naỽ brutus ac ymadnabot a phaỽb ohonaỽ; ky+
meint uu y daỽn yn eu plith hyny oed garedic a ch+
ymeredic y gan y brenhined a|r tywyssogyon yn
uỽy no neb o|e gyfoetyon. A hynny oed o|e pryt a|e
deỽred a|e haelder a|e daeoni a|e vilỽryaeth a|e glot.
A Sef achaỽs oed hynny. doethaf oed ym plith
y doethon. deỽrhaf ym plith yr ymladwyr. Ac y+
gyt a hynny beth bynhac a damweinhei idaỽ nac
eur nac aryant na meirch na dillat. hynny a| rod+
ei ef o|e gytuarchogyon. Ac y paỽb o|r a|e mynhei
y| gantaỽ. A guedy ehedec y glot ef tros teruyneu
groec; yd ymgynullyssant attaỽ paỽb o|r a han+
oed o genedyl tro. o pop lle hyt yd oed teruyneu
groec. Ac erchi idaỽ ef bot yn tywyssaỽc arnadunt.
Ac eu rydhau o geithiwet guyr groec. A hynny
| « p 3 | p 5 » |