NLW MS. 3036 (Mostyn 117) – page 78
Brut y Brenhinoedd
78
a dywaỽt iuuenal ỽrth nero amheraỽdyr rufein.
pan y coffaỽys yn|y lyuyr ef. Ti a geffy heb ef vren+
hin creulaỽn cadarn y|th erbyn o ynys prydein. A heb
petrus Gueiryd a·darwenidaỽc oed hỽnnỽ. Nyt oed
yn ymlad gỽr gadarnach noc ef. Nyt oed ar hedỽch
gỽr arauach. nyt oed vn digriuach. Nyt oed yn rodi
da; ỽr haelach. A guedy teruynu diewed y uuched
A|e uarỽ. y|cladỽyt yg kaer loyỽ y myỽn temhyl ry
wnathoed ynteu yn enryded y loyỽ amheraỽdur rufein.
A Guedy marỽ Gueiryd. y doeth Meuryc y vab yn+
teu yn vrenhin. Gỽr anryued y prudder a|e doe ̷+
thineb oed hỽnnỽ. Ac ym pen yspeit guedy y vot yn
guledychu; y|doeth Rodric vrenhin y ffichteit o scith+
ia a llyges uaỽr gantaỽ hyt yr alban y|r tir. A dech ̷+
reu anreithaỽ y|guladoed hynny. A dyuot a oruc Me ̷+
uryc yn|y erbyn a chynnulleitua uaỽr gantaỽ. Ac
ymlad ac ef a|e lad. A guedy caffel o ueuryc y uud ̷+
ugolyaeth. drychauel maen maỽr a wnaeth yn
arỽyd caffel o·honaỽ ef y uudugolyaeth yn|y wlat
a elwit o|e enỽ ef wintymar. Sef yỽ hynny yg kym+
raec. gỽys meuryc. Ac yn|y maen hỽnnỽ yd oed yn
yscriuenedic gueithredoed meuryc. ỽrth gadỽ y
gof er hynny hyt hediỽ.
A Guedy llad Rodric. y rodes Meuryc ran o|r alban
y|r pobyl orchyfygedic a dothoed gyta Rodric
y pressỽylaỽ yndi. A|r wlat a rodes ef udunt ỽy
a elwit katneis. A diffeith oed heb neb yn|y chyf+
| « p 77 | p 79 » |