NLW MS. Peniarth 11 – page 275r
Ystoriau Saint Greal
275r
hỽnn a|dywaỽt. Weldy racko heb ef yr hỽnn y coỻeist di dy
gasteỻ o|e achaỽs. ac ar hynt distrywa ef. a|gỽedy hynny
ni aỽn ỽrth angeu gỽalchmei. ac yr|aỽr y gỽeles meliot
ef. ef a|esgynnaỽd ar|y varch. Ae tydi heb y marchaỽc o|r
galis a|dynnaỽd vy marchogyon i y|r ỻaỽr. Myn vym
penn i heb·y meliot nyt oed deu di yr vn o·nadunt. na+
myn duỽ bioedynt. a|thi a|wnaethost gormod o drỽc pan
y ỻedeist ỽynt yn|y mod hỽnnỽ. Ac ar hynny ym·gyrchu a
orugant. a meliot a|e trewis ef yng|kedernyt y daryan
yny vyd trỽydi a|thrỽy y luric. ac yny vyd y gỽaeỽ yn|y dw+
yvronn. Y marchaỽc yna a|drewis meliot yny vyd y gỽa+
eỽ drỽy y daryan. ac y·rỽng breich ac ystlys idaỽ ynteu
mỽy no ỻatheit. A thynnu y waeỽ attaỽ a|oruc ef o lit. a
mynet y gymryt redec o|e varch ar|uedyr roi dyrnaỽt a
vei weỻ. Ac yna y corr a dywaỽt. paham y gedy di y hỽnn
racko barhau y|th erbyn. ac ar y|geir hỽnnỽ kyrchu me+
liot a|oruc ef. a|e daraỽ yny vyd y gỽaeỽ yn dryỻeu. Me ̷+
liot eissyoes a|e trewis ynteu yn weỻ. kanys ef a blanna+
ỽd y gledyf ym|perued y gorff. ac a|e gythyaỽd yny vyd dan
draet y varch y|r ỻaỽr yn varỽ. Y corr yna a|geissyaỽd ffo. E+
issyoes meliot nys gadaỽd idaỽ. namyn torri y benn a|o+
ruc. o|r achaỽs y diolches y vorwyn idaỽ yn vaỽr. Meliot y+
na a|disgynnaỽd ac a|gladaỽd y marchaỽc a|oed yn|y capel
yn varỽ. a|gỽedy hynny ef a|dywaỽt ỽrth y vorỽyn nat|oed
| « p 274v | p 275v » |