NLW MS. Peniarth 15 – page 134

hynaỽs arogleu gantaỽ Mi a ỽelaf oleỽ yn dyfot attaf. Mi a|welaf

ỻawenyd. ỻyma vi gwedi yr gyfodi yn iach. Y dreic leỽ a|ledeis ac a

sethreis dan vyn|traet a|r gobeith a oed gennyf yn duỽ. Ac ỽrth hynny

y diolchaf y duỽ. kanys didi yssyd naỽd ac amdiffyn y|r holl greadury+

eit. Tidi yssyd uudugolyaeth y|r hoỻ verthyri. Tidi yssyd lywyaỽdyr y r

saỽl yssyd vyỽ ti yssyd iachỽyaỽdyr paỽb a hynny yn oes oessoed. A pho+

et gwir a pheỻ vo hynny. A|thra yttoed hi yn dywedut hynny ar y gw+

edi y kychwynnaỽd y kythreul ac ymauael a ỻaỽ y gỽynuededic vargret

a dywedut val hyn Margret heb ef bit digaỽn genhyt ti a wnaethost gorf+

fowis beỻach a gỽrthrymu vym person i. gwastat iaỽn a pharhaus

y gỽedir di Miui a anuoneis y coch vym mraỽt yn rith y dreic y th

lynku ac y|dileu dy gof. a|th enỽ o|r daear ac o|r byt hỽn. Ac y lygru

dy vorỽyndaỽt ac y distroỽ dy tegỽch a|thitheu a ỻedeist ef. ac arwyd

y croc crist. A chyt a hynny yd ỽyt trỽy dy wedi yn keissaỽ vy ỻad

ỻad* inheu. Ac yna y kemerth Margret santes y kythreul o·herwyd gwallt

y ben a|e taraỽ orth* y daear Ac y dodes y|throyd y warr a|dywedut ỽrthaỽ

Peit beỻach a dywedut am vy morỽyndaỽt i. y mae ymi duỽ yn ganhỽr+

thỽyr. Gorffowis uutred tanbeit engyryaỽl o waylot uffern. Oen y|grist

ỽyf|i. A dof a chartrefic ỽyf y|r iaỽn ffyd. ỻaỽ·vorỽyn ỽyf y grist A

chymar ỽyf y|duỽ y gỽr a vo bendigeit yn oes oessoed. A|thra yttoed

hi yn dywedut hyn. yn dissymỽth yd echthywynnaỽd lleuer ym pres+

sỽyluot y karchar Ac arwyd y groc a welat yn gyfuch ac o|r llaur

hyt y nef A|chyt a|hynny y discynnaỽd colomen ar pen y hyscỽyd hi

a dywedut ỽrthi. Gỽyn|dy uyt ti vargret. kanys yr hoỻ seint yssyd

y|th aros ym phort paradỽys. Ac yna y dywaỽt Margret ytti ar+

glỽyd duỽ y diolchaf|i hynny. Ac o|r lle gwedy hynny y troes hi at y

kythreul ac y dywaỽt ỽrthaỽ. datgan di imi pan·yỽ dy anyan di

y kythryul a dywaỽt. Mi a|atoligaf itti wassaneth·uorỽyn santes y

duỽ drychafel dy|troet y iar* vyg|gỽar i. A mi a datganaf. it vyg

gỽethredoed. Ac veỻy y gwnaeth hi. Ac yna y dywaỽt y kythreul

dialwr yỽ vy enỽ gỽedy belsebub. Sef oed hỽnnỽ duỽ y kylyon rac

meint o gylyon. a dygỽydei ar y delỽ ef o achaỽs gỽaet yr aniueileit

a ledit yn abethu* rac y vron ef. ỻawer o weithrodoed* a ỻafur* gofiriu*

a lyncaf|i. hy* y|mheruet vyg|groth. Sef yỽ hynny ỻawer o weithredoed

da a diffrỽythaf|i. Ac yn erbyn paỽb yd ymladaf|i. Ac ny aỻỽyd neb

hyt hynn vyg|goruot i. A|ỻyna vi gỽedy|r goruot arnaf ohonat