NLW MS. Peniarth 18 – page 53v
Brut y Tywysogion
53v
y|gann ystyphan archescob keint. A chardinal
o rufein ac y dodet ynn anrydedus y|myỽn yscrin
o gyỽreinỽeith eur ac aryant a mein gỽerth+
vaỽr yn eglỽys y|trindaỽt yg|keint. Y|ulỽydyn
honno y|gelỽis llywelyn ap ioruerth ataỽ gann mỽyaf
tyỽyssogyon kymry oll. A chynullaỽ diruaỽr
llu a oruc am penn fflandrysỽyr ros a|phennuro
am torri o·nadunt yr hedỽch. A|r kygreir a|ỽn+
aethoed ỽyr lloeger yrỽg saesson a chymry
drỽy ỽneuthur mynych gyrcheu ar y|kymry
ac aulonydu arnunt. Ar dyd kyntaf y|kyr+
chaỽd castell arberth yr hỽnn a·deilassei y|flan+
drassỽyr ỽedy y|distryỽ o|r kymry kynn o|hynny.
A chael y castell y|treis a|ỽnaeth a|e vỽrỽ yr llaỽr
ỽedy llad rei o|r castellỽyr. a|llosci ereill. a|char+
charu ereill. A thrannoeth y|distryỽod castell
gỽis. Ac y|llosges y|tref. Y|trydydyd y doeth y
haỽlford ac y llosces y|tref oll hyt ym|porth y
castell. Ac velly y|kylchynaỽd ros a deu gledyf
pum niỽarnaỽt trỽy ỽneuthur diruaỽr aer+
ua ar|bopyl y|ỽlat. A gỽedy gỽneuthur kygre+
ir ar|fflandrassỽyr hyt galann mei yd ymhoel+
aỽd dracheuen yn llaỽen hyuryt. Y|ulỽydyn rac+
ỽyneb y|magỽyt teruysc yrỽg llywelyn ap ioruerth. a
grufud y|vap o achaỽs cantref meironnyd a|darestyg+
assei ruffud idaỽ o achos y sarhaedeu ry|ỽnaeth+
| « p 53r | p 54r » |