NLW MS. Peniarth 190 – page 183
Ymborth yr Enaid
183
aniweirdeb. O|r e. kymer ehutrỽyd yssyd
ỽrthỽyneb y lesged. Prif wydyeu. bratheu
angheuolyon ynt y lad yr eneit. o·ny byd
medeginyaeth a|e gỽaretto. Tri ryỽ vedegi+
nyaeth yssyd yn eu herbyn. nyt amgen
Ediuarỽch medỽl. Kyffes tauaỽt. a|phe+
nyt gỽeithret. Ac veỻy y teruyna y ran
gyntaf o|r ỻyvyr hỽnn. o|r gỽydyeu gochel+
adỽy a|r kampeu arueradỽy.
T Raether beỻach am dỽywaỽl garyat.
drỽy yr hỽnn y kyssyỻdir y creaỽdyr
duỽ a|e greadur dun. Ac yn gyntaf reit yỽ
gỽybot beth yỽ caryat. a pha wed y gỽehe+
nir keingeu karyat. ac o|ba fford y daỽ kyf+
yaỽn garyat. Seint aỽstin a|dyweit val
hynn beth yỽ karyat. karyat yỽ nebun
vywyt yn kyssyỻdu deu·peth ygyt. neu
yn eidunaỽ eu kyssyỻdu. Deu ryỽ gary+
at yssyd. nyt amgen. karyat serchaỽl
trigyedic tragywydaỽl. a|charyat eỻyỻ+
eid difflannedic amseraỽl. Y kyntaf a|dodir
| « p 182 | p 184 » |