NLW MS. Peniarth 33 – page 122
Llyfr Blegywryd
122
ẏ|pren ẏgẏt a|gỽerth ẏ|bẏdaf a|telir
ẏ arglỽẏd ẏ|tẏr. ẏ neb a gaffo bẏ+
daf os dengẏs ẏ|r perchennaỽc;
pedeir keinnaỽc a|e ginẏaỽ a geiff
neu ẏ kỽẏr. Nẏ|thal neb heit on+
nẏt pedeir keinnaỽc hẏnnẏ vo|tri
dieu ẏn wastat trỽẏ awel eglur
dẏd·gỽeith ẏ|geissaỽ lle; a|dẏd ẏ|vudaỽ
.a|dẏd ẏ|orffỽẏs Y neb a gaffo heit ̷
ar tir dẏn arall. pedeir keinnaỽc
a geiff ẏ|gan berchennaỽc ẏ|tir
o|r mẏn ẏnteu ẏr|heit. ~ ~ ~ ~ ~ ~ ~ ~ ~ ~ ~
A Elodeu vn werth ẏ dẏn ẏnt
ẏr rei hẏnn. Dỽẏ laỽ. Deu
glusteu; Deu|lẏgeit. Deu|draet
Ffroeneu ẏn|lle vn aelaỽt. Dỽẏ
weuusseu. whe|bu a|wheugeint
arẏanat* ẏỽ gỽerth pob vn oho+
nunt O r trẏchir clult* dẏn ẏm+
deith. a|chlẏbot o|r dẏn ar·naỽ mal
kẏnt. dỽẏ vu. a|deugeint arẏant
a|tal Gwerth bẏs dẏn buch. ac
vgeint arẏant Gwerth baỽt.
dẏn dỽẏ vu. a|deugeint arẏant.
| « p 121 | p 123 » |