NLW MS. Peniarth 36A – page 29r
Llyfr Blegywryd
29r
a ỽrthodet. y gỽr a geiff y gallaỽr ar tappin
neu y bryccan. ar gobennyd ar cỽlltyr
ar uỽell gynnut. ar taradyr ar ebill ta+
radyr. ar pentan hayarn ar crymaneu
oll eithyr vn. ar gradell. y wreic bieu y
trybed ar padell. ar vỽell lydan. ar gogyr
ar sỽch. ar vn cryman. y llin ar llinat y
gỽlan ar tlysseu eithyr eur ac aryant y
rei hynny or bydant. yn deu hanher y
renhir y·rydunt. Ac velly y gỽeeu llin.
ar gỽlan yn deu hanher y renhir. Y gỽr
a geiff yr yscubaỽr. ar yt a uo ar y dayar
ac yn| y dayar ar ieir ar gath. or byd ereill
y wreic ae keiff. Y wreic a| geiff y kic yn
heli a heb halen. ac velly am y kaỽs yn
heli a heb halen. y gỽr bieu y kic ar kaỽs
drychafedic oll ar llestreit bỽlch or emenyn
ar backyneu bỽlch. ar kaỽs bỽlch. Ar wreic
a geiff or blaỽt. kymeint ac a allo y| dỽyn
rỽg y dỽylaỽ ỽrth pen y deu lin or
gell yr ty. Pob vn a geiff y wiscoed e hu ̷+
nan yn gỽbyl eithyr y mentyll a renhir.
| « p 28v | p 29v » |