NLW MS. Peniarth 45 – page 198
Brut y Brenhinoedd
198
1
dinas arnaỽ. A phan gigleu baldỽlff
2
oed a chwe mil o wyr aruaỽc gantaỽ yr
3
fo y uraỽt a|e warchae yg caer efraỽc
4
kyrchu a oruc ynteu parth ac yno a|e
5
niuer gantaỽ. y geissaỽ ellỽg y uraỽt
6
Canys pan ymladassei arthur a choll+
7
grim yd oed ynteu yna ar glan y mor
8
yn arhos dyuot cheldric tywyssaỽc a
9
llu gantaỽ yn borth udunt. Ac gỽedy
10
dyuot baldỽlff hyt ar deng milltir y ỽrth
11
y caer. medylyaỽ a wnaeth dỽyn kyrch
12
nos am pen arthur a|e lu. Ac nyt ymgel+
13
ỽys hynny y arthur. Sef a wnaeth ef an+
14
uon cadỽr tywyssaỽc kernyỽ. A chwechan
15
marchaỽc a|their mil o pedyt gantaỽ y
16
raculaenu y ford y tebygynt eu dyuot.
17
Ac gỽedy caffel y cadỽr y ford y deuynt
18
Dỽyn kyrch a wnaeth am eu pen a|e ky+
19
mell ar fo. A diruaỽr tristit a gymyrth
20
Baldỽlff yndaỽ ỽrth na allỽys canhorth+
21
ỽy y ellỽng y uraỽt o|r gwarchae yd oed
22
yndaỽ. A medylyaỽ a oruc pa wed y gall+
23
ei caffel ymdidan a|e uraỽt. Canys ef
24
a|tybygei pei keffynt gyurỽch y gyt y
25
ystrywaỽ beth a wnelynt y keffynt holl
26
rydit a gwaret; ~
| « p 197 | p 199 » |