NLW MS. Peniarth 45 – page 237
Brut y Brenhinoedd
237
uyneu freinc neu ynteu rodi cat ar uaes
y arthur tranoeth y ỽybot pỽy a|uei oreu o+
nadunt y dylyet ar freinc. Ac annoc a
oruc ieuengtit llys arthur y walchmei gỽne+
uthur gỽrthgassed yn llys yr amheraỽdyr ual
y bei reit teruysgu y lluoed o bob parth rac
y chwanoget y urỽydyr a gwyr ruuein.
Ac gỽedy dyuot y kennadeu rac bron yr am+
heraỽdyr. Erchi a wnaethant idaỽ adaỽ ter+
uyneu freinc y gan arthur neu uot yn pa+
raỽt tranoeth y erbyn cat ar uaes. Ac
ual yd oed yr amheraỽdyr yn dywedut nat
mynet o·honi a dylyei namyn dyuot y
hamdifyn ac y llywaỽ. Ac yna y dywot
Gaius nei yr amheraỽdyr bot yn uỽy bocsach
a hoffder y bryttanneit noc eu gallu. Ac
yn hỽy eu tauodeu noe cledyfeu. A|llidyaỽ
a oruc Gwalchmei am dywedut mor tremy+
gedic a hynny o|r gỽraanc a dispeilaỽ cled+
yf a llad y penn. Ac yn gyulym cael eu me+
irch. A|e herlit a oruc gwyr ruuein udunt
y geissaỽ dial eu gỽr arnadunt. Sef a oruc
Gereint ymchoelut ar y gỽr oed nessaf idaỽ
yny odiwes a|e wan a|gwayỽ trỽydaỽ a|th+
rỽy y holl arueu yny ydoed yr llaỽr yn uarỽ
| « p 236 | p 238 » |