BL Additional MS. 19,709 – page 14v
Brut y Brenhinoedd
14v
anelu bva a|bỽrỽ corineus a|saeth. sef a wnaeth corin+
eus gochlyt y|saeth. ac ysclyfyeit y|bva o|e* laỽ ymbert
ac a|r bỽa brivav y benn yny oed y ymenyd am y|deu+
glust a dechreu ffo a wnaeth y ỻeiỻ ac o vreid y diaghassant ẏ
gantaỽ ac y|managassant hynẏ y eu harglỽyd. a|thristau a|wna+
eth y|brenhin yn vavr a|chynuỻav ỻu y dial agheu y genhat
arnadunt a gỽedy gvelet o vrutus hynẏ kadarnhau y logeu
a wnaeth ynteu. a gossot yndunt y gỽraged a|r meibon. ac yn+
teu a|r hoỻ gynuỻeitua o|r gỽyr a aethant yn erbẏn y|brenhin
a|gỽedy bydinaỽ o|bavb eu gỽyr o|pop parth ymlad a|wnaethant
yn galet ac yn greulavn a|gỽedy treulav ỻawer o|r dyd yn|ẏ
wed honno kywilydyav a|wnaeth corineus hỽyret yd oedynt.
yn caffel y vudugolyaeth na ỻauassu o|r fichteit bot mor leỽ
a hẏnẏ yn eu herbyn. Ac yna sef a|wnaeth corineus galỽ y|leỽ+
der attav a|chymryt y|wẏr e|hun y·gyt ac ef a mynet ar neiỻtu.
yn|y parth deheu y|r ymlad a|gvedy kyweiraỽ y vydin ohonav
kyrchu y|elynyon a oruc yny aeth e|hun yn eu kanavl. ac ny
orffoỽyssỽys yny kymheỻỽys ar ffo. a gỽedy coỻi y|gledyf y
damwinỽys* idaỽ kaffel bveỻ deỽynebaỽc. ac a hono y|gỽaha+
nei a|gyfarffei ac ef o|warthaf y pen hyt yg gvadyneu eu traet
a ryfed oed gan baỽb o|r a|e gỽelei devret y gỽr a|e gryfder a|e
gedernhit. gan yskytweit bỽyaỻ deu·ỽynybavc y gyrrei ofyn
a|ffo ar y elynyon gan yr ymadravd hon. pa le|wyr ofnyavc ỻesc
y|foỽch chvi. ymchoelỽch ac ymledvch a|chorineus gvae chvi druein
rac kewilẏd y|saỽl uilyoed yd yỽch yn|ffo rac vn gỽr. a|chymerỽch
yn ỻe didan agheu gaffel ffo ragof|i. kanys kymheỻeis y creulon+
yon geỽri ar|ffo ragof ac a|e ỻedeis pop tri pop petwar
Ac ỽrth hẏnẏ sef a|wnaeth suardus tywyssaỽc kymryt
| « p 14r | p 15r » |