Oxford Jesus College MS. 119 (The Book of the Anchorite of Llanddewi Brefi) – page 15r
Ystoria Lucidar
15r
idaỽ gynt. Ac am hynny y|dywedir. tebic yỽ pe+
chaỽt kyfuarỽydyon y annvfydaỽt. Trydyd yỽ.
kebydyaeth. Am chỽenychv ohonaỽ moe noc
a|gynnhedessit idaỽ. Ac am hynny. yaỽn yỽ id+
aỽ colli yr hynn a|gynnhadỽyt idaỽ. Am hynny
y|dyỽedir. Gỽassannaeth gevdỽyev yỽ kebydy+
aeth. petweryd pechaỽt uu. lletrat. kannys me+
gys lledrat oed kymryt da dros wahard yn lle
kyssegredic. Ac vrth hynny yd haydaỽd ef y|vỽ+
rỽ y|maes o|r kyssegyr. Ac am hynny y|dyỽedir.
a|ysgymuno y kyssegyr. ef a|vỽrir odieithyr y
kyssegyr. Pymet vu. Torri priodas. yn ysprydaỽl.
kannys y eneit oed gysselldedic y|duỽ. A|phann
aeth ef yg|kytemeithas y diaỽl. gann tremegv
duỽ. y kolles ef getymeithas duỽ. Am duunaỽ
ohonaỽ ac estron. Ac am hynny y dyỽedir. Ti
a|vyry baỽp yg|kyfyrgoll. o|r|a|torro priodas a|thi.
Chwechet yỽ. llad kelein; kannys ef a|e byrya+
ỽd e|hun. A|e holl etiuedyon benndramwnỽgyl
yn anghev. Am hynny y|dyỽedir. A|ladho ef a
vyd marỽ. nyt amgen. o anghev tragyỽyd. ̷
Odyna pann oruc ef y|pechaỽt. y|bv varỽ yr ene+
it. Ac y kladỽyt yn|y korff. Paham na|bei lei y
geryd ef am y dỽyllaỽ o|r yspryt ennwir kelỽy+
daỽc.
| « p 14v | p 15v » |