Oxford Jesus College MS. 119 (The Book of the Anchorite of Llanddewi Brefi) – page 66r
Ystoria Lucidar
66r
O getymeithas y|seint. Ketymeithas dauid. A
Jonathas. gelynnyaeth vydei hynny gantunt
ỽy. Oỽi o|r velys getymeithas yssyd yny* eu kỽp+
plyssu ỽynt. Duỽ a|e car ỽynt megys y|veibon.
Ac wynteu a garant duỽ yn voe noc ỽynt e|hun.
Ar holl engylyon. ar holl seint a|e carant ỽynt
megys ỽynt e|hun. O|duundeb y seint. Duhun+
deb lesius a sipio. angkyssondeb vydei hynny gan+
tunt ỽy. kannys kynn duunet vydynt ỽy. ar
deu lygat. kannys y lle yd edrycho vn. ef a|drossa
y|llall yn diannot. Beth bynnac a|vynnho vn o+
nadunt. ef a|e mynn duỽ ar holl egylyon. Ar|holl
seint. Os duỽ ar holl seint a vynnant pob peth
o|r a|vynnỽyf|i. mynhev yna a|vynnhaf vy|mot
yn gyffelyb y bedyr. Diogel yỽ os mynny y|bydy
yn diannot. Dyoer ny dyỽedaf|i dy vot yn beder.
namyn yn gyffelyb idaỽ. kannys pei eidunut ti
dy vot yn bedyr. ti a|eidunut na bydut du hun.
Ac onny bydut duhun ny allut dim. kanny chỽe+
nych neb dim mỽy noc a|brynno. megys na chỽe+
nych y|troet vot yn llygat. na|r llaỽ vot yn glust
neu y|gỽr vot yn wreic. kannys pei chỽenychynt
ỽy mỽy no dylyet ny cheffynt ỽy gyfulaỽn leỽe+
nyd. A|phaỽb a geiff gyfulaỽn leỽenyd yna. vrth
hynny. nyt eidunant mỽy no hynny. Ac nyt
| « p 65v | p 66v » |