NLW MS. Llanstephan 27 (The Red Book of Talgarth) – page 35r
Ymborth yr Enaid
35r
gỽaỻt oỻ yn|bengrychlathyr hyt ar yr iat. ac yno yn benỻyvyn+
lỽys gribedicloeỽ ỽrth gymhỽyssaỽ yr eur goron arnaỽ. a gỽyn+
dal gỽastatlyvyn ehanglathyr mereritliỽ idaỽ. a|dyrnued amyl
y|r gỽr mỽyaf yn|y|let. a rychwant ehalaeth yn|y hyt o|r eneitrỽ+
yd y gilyd. ac ydan hynny dỽy burloewduon hirueinyon aeleu
megys dỽy veingk o|r muchud gloewduaf a|vei y myỽn
diruaỽr greic o|r crissyalt neu o|r mererit ỻathyrwynnaf
o|r a|aỻei vot. neu gynhebic y dỽy veinbleth o vein sidan gloe+
wdu ar dỽy lawes o|r ysgarlat claerwynnaf a|vei. Ac y·rỽng
y|dwy ael arỻỽybyr pevyrganneit disgleirder megys maen
mererit ỻathreit. yng|kymherued byrỻysc o|r baem gloedu*+
af a|vei. Ac odyna ydan deu amrant ganheitlathyr ac
ambeỻ|vleỽ arnunt megys ar yr aeleu yd oed deu rudeỻy+
on lygeit bỽmpaeid dremwalcheid. ac onadunt yn gỽane+
gu man|dagreu karueidserch. megys manwlith mis mei
neu van|davyneu o aryant byỽ. a hynny o annwylserch
garyat ar y ffydlonyon greaduryeit. a|r dagreu hynny
a|elwit gỽlith yr yspryt glan. Y rei hynny a dygỽydynt
y|myỽn caỻonneu y penytdynyon a|wnelynt eu penyt
yn deilỽng. a|diogel vydei yno ry gaffel rat y gan yr yspr+
yt glan a|e gỽbyl annwylserch garyat. Ac y·rỽng y deu|rud+
eỻyon lygeit yd|oed yn kyrchu byrgrỽn destluslỽys eneu
a|thrỽyn kyfladdrum unyaỽnỻun ffroeneu agoret. ac
yn|gỽanegu serchaỽlvryt garyat. o arafber gyffro y dw+
ywolyon ffroeneu. Ac yng|kylch y nefaỽl drỽyn hỽnnỽ yd
oed deu glaerwynnyon ganheitbryt wyneb kyn|grynnyon.
a|rychwant amyl y|r gỽr mỽyaf. yn|y hyt ac araỻ yn|y let
| « p 34v | p 35v » |