NLW MS. Llanstephan 27 (The Red Book of Talgarth) – page 67v
Buchedd Dewi
67v
y niuer hỽnnỽ yn|gyffredin. gadv hỽnnỽ ohonunt yn|benna+
dur ar seint ynys prydein. ac yna y dechreuaỽd y seint
pregethu bob eilwers. Ac yna y dywaỽt vn dros y kyffredin.
Y canuet dyn heb ef o|r gynnuỻeitua honn ny chlyỽ dim
o|r bregeth. yr yỽch yn ỻauuryaỽ yn ouer o gỽbyl. Yna y dy+
waỽt paỽb o|r seint ỽrth y gilyd. nyt oes neb ohonam ni a
allo pregethu y|r niuer hỽnn. a|ni a|e profassam bob eilwers.
a ni a|welỽn nat oes ras y neb o·honam ni y bregethu y|r ni+
uer hỽnn. Edrychỽch a medylyỽch a|wdaỽch chỽi a|oes neb
mor deilỽng ac y gaỻo pregethu y|r niuer hỽnn yma. Yna
yd attebaỽd paỽlinus sant. a hen esgob oed. Myui heb ef a
wnn was ieuangk tec aduỽyn. ac angel yn wastat yn gedym+
deith idaỽ. a mi a atwen heb ef y vot ef yn|gymmen ac yn
diweir. ac yn karu duỽ yn uaỽr. a|mi a|ỽnn y car duỽ ynteu.
a|e vot yn gyfrannaỽc ar yr hoỻ uoesseu da. Myui a|ỽnn heb ef
mae mỽyaf dyn rat duỽ arnaỽ yn yr ynys honn yỽ hỽnnỽ.
a dauyd sant y gelwir. Yn gyntaf ef a|dysgaỽd ỻen a berthyn+
ei idaỽ y dysgu ar y|dechreu. A gỽedy hynny ef a|dysgaỽd y
gennyf|inneu yr ysgruthyr lan ac a|vu athro. ac yn ruuein a
urdwyt yn archescob. a mi a|weleis heb ef angel yn|dyuot
attaỽ ac yn galỽ arnaỽ. ac yn erchi idaỽ vynet y wlat y gyfan+
hedu y ỻe a barchassei duỽ idaỽ yn|teyrnas demetica. Sef yỽ
honno mynyỽ yn|y deheu. Eỽch a|gelỽch hỽnnỽ ef yssyd yn
caru duỽ yn vaỽr. ac yn pregethu o grist. a|myui a|ỽnn mae
idaỽ ef y rodes duỽ y gras. Ac yna yd anuones y seint gennadeu
hyt yn dinas rubi y ỻe yd oed dauyd sant gwas duỽ yn gỽediaỽ ac
yn dysgu. A phan gigleu ef neges y kennadeu. ỻyma yr atteb
| « p 67r | p 68r » |