NLW MS. Llanstephan 27 (The Red Book of Talgarth) – page 74r
Buchedd Beuno
74r
phenn yn|y chỽynaỽ. Teỽch origyn heb ef a|gedỽch hi ual y
mae yny darffo yr offeren. a|beuno yna a aberthaỽd y duỽ. a
phan|daruu yr offeren y uorwyn a|gyuodes yn hoỻiach. ac
a|sychaỽd y chỽys y ar y hwyneb. ac a|e gỽnaeth duỽ a beuno
hi yn hoỻ·iach. ac yn|y ỻe y syrthyaỽd y gỽaet ar y daear y
kyuodes ffynnaỽn odyno. a|r ffynnaỽn honno hyt hediỽ ys+
syd yno yn rodi iechyt y dynyon ac aniueilyeit oc eu hei+
nyeu a|e clỽyfeu. a|r|ffynnaỽn honno a|ennwit o enỽ y uo+
rỽyn. ac a|elwit ffynnaỽn wenvreuwy. a|ỻawer o|r a|welsant
hynny a gredassant y grist. ac vn o|r rei a gredaỽd yna
uu gatuan vrenhin gỽyned. a hỽnnỽ a rodes y ueuno
lawer o dir a|daear. A gỽedy marỽ katuan yd aeth beuno
y ymwelet a chatwaỻaỽn uab katuan a|oed vrenhin gỽe+
dy katuan. ac erchi a|oruc beuno tir y gatwallaỽn. kan+
nyt oed idaỽ yn|y kyuamser hỽnnỽ le y wediaỽ duỽ nac
y bressỽylaỽ yndaỽ. Ac yna y brenhin a|rodes y veuno le
yn aruon a|elwir gỽaredaỽc. a|beuno a rodes y|r brenhin
gỽaeỻ eur a rodassei gynan uab brochỽel idaỽ ynteu pan
uuassei uarỽ. a|r waeỻ honno a|dalei trugein mu. Ac yno
yd adeilyaỽd beuno eglỽys. ac y dechreuaỽd adeilyat mur
yn|y chylch. Ac ual yd oed ef dydgỽeith yn gỽneuthur y mur
hỽnnỽ a|e disgyblon y·gyt ac ef. nachaf y gỽelynt yn|dy+
uot attunt. gỽreic a mab newyd eni yn|y harffet. ac yn erchi
y ueuno vedydyaỽ y mab. Heb·y beuno ha|wreic aro origyn
yny orffennom hynn. a|r mab yn wylaỽ ual nat oed haỽd y
diodef. Ha|wreic heb·y beuno ffest a|beth yd ỽyl y mab. a wr
da sant heb y wreic y mae achaỽs idaỽ y hynny. Ha|wreicda
| « p 73v | p 74v » |