Breudwd Welsh Prose 1300-1425
Cymraeg

NLW MS. 3035 (Mostyn 116) – page 181v

Brut y Tywysogion

181v

y kyfaru* wyr jarỻ bristaỽ ac ef ar y|ford yn dyuot o gaer dyf
ac y ỻadyssant. a gỽedy y lad ef yna y diffeithaỽd y|tat a|hy+
wel y vraỽt a ỻawer o rei ereiỻ heb ymdiret o|r achaỽs hỽnỽ
y|r brenhin o neb vn mod kyfoeth y brenhin hyt yn henford
a|chaer loyỽ drỽy lad a|ỻosgi ac anreithaỽ heb drugared.
ac yna heb odric yd aeth y brenhin y|freinc wedy gossot yr
arglỽyd rys yn iustus yn hoỻ deheubarth. Yg|kyfrỽg hẏny
y|delit seissyỻ ap dyfynwal a jeuan ap dyfynwal a ridit
drỽy dỽyỻ y gan y|wyr y brenhin ac y charcharỽyt yg|casteỻ
aber gefeni. Y|vlỽydẏn racỽyneb y bu diruaỽr ar·dymer
ar|hinda ar hyt y gayaf a|r gỽanỽyn a mis mei hyt duỽ
jeu kyfarchafel. a|r dyd hỽnỽ y kyfodes diruaỽr dymestyl
yn yr awyr o taraneu a|meỻt a|chorwynt a|chawadeu
kenỻysc a|glaỽ. Y rei a|dorres kageu y|gỽyd ac a vyrryawd
y coedyd hyt y|ỻaỽr. a|r ryỽ bryfet a doeth. y vlỽydyn hono
y yssu deil y gỽyd yny diffrỽythaỽd yny diffrỽythaỽd hay+
ach pop ryỽ bren. Y|vlỽydyn hono a|r vlỽydyn kyn no hi
y coỻet ỻiaỽs o|r dynyon a|r anifeileit ac nyt heb achaỽs
kanys y vlỽydyn hono y ganet Mab y|r arglỽyd rys o
verch veredud ap gruffud y|nith verch y vraỽt. Yg|kyf+
rỽg hẏnẏ pan yttoed henri vrenhin hynaf y|tu draỽ y|r
mor y doeth y vab henri jeuaf vrenhin newyd attaỽ y
ofyn idaỽ beth a delei y|wneuthur. kanys kyt bei vrenhin eff
ỻawer oed idaỽ o varchogyon ac nyt oed gantaỽ ford
y|dalu kyfarỽsseu a rodẏon y|r marchogẏon ony|s kymerei
yn|echwẏn y gan y dat a|r amser hỽnỽ a oed rawys a|e
dat a dywaỽt ỽrthaỽ y rodei idaỽ vgeint punt o vỽnei
y|wlat hono beunyd yn dreul ac na|chaffei mỽy ac ynteu