NLW MS. 3035 (Mostyn 116) – page 6v
Ystoria Dared
6v
dugant y|r ỻog a gỽraged ereiỻ heuyt ygyt a|hi. Ac val y
gỽelas y|casteỻwyr ry|dỽyn elen ymlad yn hir ac alex+
ander a|wnaethant hỽẏ a|cheissaỽ eu ỻudyas ac eissoes a+
lexandyr o|luossogrỽyd y getymdeithon ef a oruu arnunt
hỽẏ ac a|yspeilaỽd y demyl ac a|duc ỻawered o dynyon yg
karchar gantaỽ yn|y ỻogeu a|cherdet a|e lyges gantaỽ a
wnaeth ef ac ardunockau ymchoelut a·dref ac y|borthua
tenedon y deuth ef a|e lyges y|r tir ac o|eireu tec didanhu
elen a oed yn drist a|wnaeth ef. ac anuon kanat at y|dat
y|datkanu y|gyfranc. ac yna gỽedy clybot o|venelaus
ry dỽyn elen ef a deuth a nestor o|pilus y|ynys sporta
ac a anuones y argos at agamemnon y vraỽt y erchi
idaỽ dyuot attaỽ ac yn|y kyfrỽg hẏnẏ alexander a|deuth
at y dat ac anreith vaỽr gantaỽ ac a|datkanaỽd y|gẏfranc
yn ỻỽẏr a|ỻawen vu briaf a gobeithaỽ o|achaỽs y gorderch+
at hỽnnỽ yd atuerei gỽyr groec esoniam a|dugyssynt
kynno hẏnẏ o droea. a|didanu elen a oed yn drist a|wnaeth
ef a|e rodi yn wreic y alexander. ac yna val y gỽelas cas+
andra verch briaf. Elen hi a dechrewis dewinyaỽ a|dy+
wedut a dỽyn ar gof yr hyn a racdywedassei am yr
hyn y|ỻidyaỽd priaf ac y gorchymynaỽd idi y attynu a
thewi. ac ef. Agamemnon ynteu yna gỽedy y|dyuot y
ynys sporta a|didanỽys y vraỽt ac ef a regis bod idaỽ
ef a anuones kỽynwyr drỽy hoỻ roec ac y|gynuỻ ket+
ymdeithon megys y|geỻynt hỽy vynet yn hyborth
y ymlad a gỽyr troea a|r kenadeu a|deuthant drache+
fyn. Ac yna gỽedẏ dyuot a chiỻes a|phetro+
clus a|thelopolenus a dio medes y ynys
sporta da vu gantunt hỽy baratoi ỻyges a
ỻu maỽr y dilit ac y|dial y|saraedeu ar|wyr troea. Ac
| « p 6r | p 8r » |