NLW MS. Peniarth 32 (Y Llyfr Teg) – page 108
Llyfr Iorwerth
108
traean ar y ỻofrud. a hynny ỽrth nat oes gened+
yl y|r tat a|e talho. a hỽnnỽ a|elwir yn|warthec
dy·uach. Sef achaỽs y gelwir yn warthec dy+
uach; ỽrth vot yn|dir meichaỽ ar y gỽarthec
hynny. kanys ar warthec y telit pob tal gynt.
Y deu vab a|dywedassam ni uchot; vn vreint ac
un werth. ac vn sarhaet ynt a bonhedic canhỽy+
naỽl os kymraes vyd eu mam. Os aỻtudes vyd
eu mam; aỻtudyon vydant ỽynteu. Mab dolef
a vyd a mab diodef. Sef yỽ mab dolef. Mab a
dywetto gỽreic ar y thauaỽt leueryd y vot yn
uab y wr. ac na|s dycko y|r dygyn. hỽnnỽ a|elwir
mab dolef. a hỽnnỽ a eỻir y wadu pan vynher.
Mab diodef yỽ; mab a|dycko gỽreic yn gyfreith+
aỽl y wr. a|e diodef o|r gỽr heb y wadu un dyd
a blỽydyn. ny eiỻ y wadu o hynny aỻan vyth.
ac o deruyd y hỽnnỽ wneuthur kyflauan kyn
penn y vlỽydyn wedy dycker; ny eỻir y wadu
ef yn yr yg. kanny wadỽyt ar yr ehag yny|diỽ+
ycker y gyflauan. ỽrth y vot yn vab diodef.
Tat a dichaỽn gỽadu mab diodef trannoeth
gỽedy diwycko y gyflauan drostaỽ os mynn
hyt ym·penn y vlỽydyn wedy dycker idaỽ.
Keffoet brenhin a vo tat y vab o aỻtudes a|e
wadu o·honaỽ; aỻtut vyd y mab. Os aỻtut
a watta mab kymraes; bonhedic canhỽynaỽl
| « p 107 | p 109 » |