Cardiff MS. 1.363 (Hafod 2) – page 130r
Brut y Brenhinoedd
130r
eno wynt ar e wed ar anssaỽd ed oedynt em my+
nyd kylara en ywerdon.
AC en er amser hvnnỽ pascen ỽap Gortheyrn
e gwr a ffoassey y gyt a ssaysson hyt en ger+
many a kyffroes e pobyl honno a|e holl ỽarcho+
gyon arỽaỽc en erbyn emreys wledyc y keyssyaỽ
dyal y tat arnaỽ. kan adaỽ ỽdỽnt anterfyned+
yc amylder eỽr ac aryant. os trwy eỽ nerth wy+
nt ac eỽ kanhwrthwy e galley enteỽ gorescyn te+
yrnas enys prydeyn. Ac o|r dywed gwedy darỽot
ydaỽ trwy y adaweỽ ef llygrv holl yeỽenctyt e
gwlat. paratoy a gwnaeth y llynghes wuyhaf a al+
ley. a dyỽot hyt eng gogled er enys a dechreỽ anr+
eythyaỽ e gwladoed. Ac gwedy kennataỽ henny
yr brenyn. enteỽ a kynnvllaỽd y holl lw ac a ae+
th en eỽ erbyn ac a elwys ar ymlad y dywal elyn+
yon. ac wynteỽ oc eỽ bod a ymladassant ar kywd+
aỽtwyr. ac eyssyoes kan ỽod dyw e kywdaỽtwyr
a orfỽant ac a kymellassant e gelynyon ar ffo.
AC gwedy kymell pasken ar ffo ny laỽassaỽd
ef ymchwelỽt tra·chefyn y Germany nam+
yn trossy y hwylyew a chyrchỽ hyt ar Gyllamỽ+
ry brenyn ywerdon a hwnnỽ a|e herbynnyaỽd
| « p 129v | p 130v » |