Cardiff MS. 1.363 (Hafod 2) – page 21v
Brut y Brenhinoedd
21v
drav y aỽon hvmyr. ac a|e gelwys o|e enw e|hỽn
kaer efraỽc. Ac yn yr amser hỽnnỽ yd oed da+
vyd proffwyt yn ỽrenyn yg kaerỽssalem
a sylỽyỽs latynỽs yn ỽrenyn yn yr eydal. a
Gad. a nathan. ac assaf yn proffwydy yn yr
ysrahel. Ac y gyt a hynny hevyt efraỽc kadarn
a orỽc kaer alclỽt kyỽerbyn ac yscotlond. a
chastell mynyd agned yr hvn a elwyr yn awr
kastell y morynnyon ar vynyd dolvrvs. Ac y g+
yt a hynny hevyt ef a anet ydaỽ ỽgeyn meyb
o ỽgeyn wraged a oedynt ydaỽ. a dec merchet
ar rỽgeynt. A deỽ ỽgeyn mlyned yn wychyr
kadarn y gwledychws ar holl teyrnas ynys pry+
deyn. ac ysef oedynt ynweỽ y meybyon.
Brỽtỽs taryan las oed y|map hynaf ydaỽ
Maredỽd. Seyssyll Rys Morỽd bleydỽd. YaGo.
bodlan. kyngar. Spadaden. Gwavl. Dardan. Eydal
yỽor. hector. kyngỽ. Gereynt. Rỽn. asser. howel. Ac|ys+
ef oedynt enweỽ y ỽerchet ef. Gloewgeyn. Jgnog+
en. Eỽdaỽs. Gwenllyant. Gwaỽrdyd. Agharat. Gw+
endoleỽ. Tanghwystyl. Gorgon. Medlan. Methael.
Ofrar. Maelfre. Kamreda. Ragaỽ. Gwael. Ertỽb.
Rest. Keyn. Stadỽd. Efren. blayngeyn. Aỽallach.
| « p 21r | p 22r » |