Cardiff MS. 1.363 (Hafod 2) – page 34r
Brut y Brenhinoedd
34r
ỽyrogaeth* ynteỽ yr ellwng ef. a|e orderch yn ryd
o|y wlat. Ac y gyt a hynny y kadarnaỽ y petheỽ
hynny arỽoll a gwystlon kymeynt ac a ỽey|dogyn
kanthaw. Ac gwedy galw y gwyrda megys y dy+
wetpwyt ỽchot. o kytsynhedygaeth y holl|wy+
rda ellwng a orỽc beli Gwythlach en ryd o|e kar+
char a|e orderch y gyt ac ef hyt yn denmarc kan ka+
darnhav eỽ hamỽot trwy arỽoll a gwystlon AC
gwedy gwelet o ỽeli nat oed nep yn y teyrnas a ky+
hytrey ac ef nac a ỽrthwyneppei idaỽ namyn bot
yn eydaỽ ef yr holl ynys o|r mor pwy gylyd. ef a ka+
darnhaỽs yna y kyfreythyeỽ ry wnathoed y dat.
Ac y gyt a hynny kadarn a gwastat yaỽnder a|gwy+
ryoned a ossodes ac a orchymynnỽs eỽ kadỽ tros y|tey+
rnas. ac|yn wuyhaf kadỽ breynt y|dynassoed. ar
ffyrd kyfreythyaỽl a kyrchynt y dynassoed. a|hy+
nny o ỽn ryw ỽreynt a|theylygdaỽt ac a wnathoed
dyfynwal y dat yntev kyn noc ef. A chanys kynhen ac
amrysson a kyỽodassey am y ffyrd kany wydyt pa
terỽyn oed ỽdỽnt. ỽrth hynny y brenyn a ỽynnỽs
gỽrthlad pob pedrỽsder ac amrysson y ỽrth hynny.
a galw y gyt a orỽc holl seyry maen yr ynys ac erchy
| « p 33v | p 34v » |