BL Harley MS. 958 – page 4v
Llyfr Blegywryd
4v
ẏstauell. nau mu a naỽ ugeint ariant.
Gwerth pob vn o·honunt ẏỽ. naỽ mu a naỽ
ugein mu gan dri dẏrchauel. Ereill a dẏwe+
dant am ẏ distein ẏ telir sarhaet a gala+
nas deudẏblic idaỽ. Sarhaet pob vn o|r
sỽẏdwẏr ereiỻ oỻ ẏỽ hwe|bu a hweugein
arẏant. Galanas pob vn o·honunt ẏỽ hwe
a hwegein mu gan tri dẏrchauel. Pan ladh+
er dẏn. ẏ|sarhaet a|telir yn|gẏntaf. Ac odyna
ẏ|werth. kanẏ eỻir ỻad neb heb ẏ sarhaỽ na+
mẏn heb drẏchauel ẏ telir. Nẏ bẏd dyrcha+
uel ar sarhaet neb. Y neb a sarhao effeiriat
neu a|e ỻatho godefet gẏfieith sened. eithyr
am weli tauaỽt. Lletẏ ẏ penteulu ẏỽ y ty
mỽẏaf ẏm|perued ẏ dref kanẏs ẏn|ẏ gylch
ef ẏ|dẏlẏ ẏ teulu letẏaỽ mal ẏ bỽẏnt paraỽt
ẏ hoỻ negesseu ẏ brenhin. Yn ỻety ẏ penteu+
lu ẏ bẏdant ẏ bard teulu a|r medic ỻẏs. Llety
ẏ distein a|r sỽẏdwẏr gẏt ac ef ẏỽ ẏ tẏ nes+
saf ẏ|r ỻẏs kanẏs ef a dẏlẏ gwassanaethu
ẏ|r ỻẏs. Ac rac* edrẏch ẏ|r gegin. Lletẏ ẏr ef+
feirat a|r ẏscolheigon ẏỽ ty ẏ caplan ẏ|dref a
ỻetẏ effeirat brenhines gyt ac ỽẏnt. Llety
ẏ penkẏnẏth a|r|kẏnẏdẏon gantaỽ ẏỽ odẏn+
dẏ ẏ brenhin. Lletẏ ẏ pengwastraỽt ẏỽ ẏ ty
nessaf ẏ|r ẏscubaỽr ẏ|brenhin a|r gwastrodẏon
| « p 4r | p 5r » |