Oxford Jesus College MS. 119 (The Book of the Anchorite of Llanddewi Brefi) – page 128r
Pwyll y Pader, Hu
128r
Megys y|dyỽedir yn|yr euegyl. Gỽynn ev byt y|rei
glan y callonnev. kannys y|rei hynny racỽyneb
a|ỽnelant duỽ. Seithuet ỽedi a dodir yn erbyn godi+
neb. Set libera nos amalo. Sef yỽ pỽyll hynny. Ryd+
haa di ni arglỽyd y gann y drỽc. Doeth synnhỽyrus
yỽr neb a eirch ryddit yr hỽnn y rodir rat ac yspryt
bydaỽl. Y doeth hỽnn a rodir pann gynnvllo bryt
e|hun yn hollaỽl o vlas ysprydaỽl velyster trỽy da+
munet petheu nefaỽl. Ac velle ny weskerir ac ny
wneir dyn yn ryd trỽy eỽyllus a|damunet y|gnaỽt.
vyth. Vrth hynny yn erbyn didannỽch odieithyr
y|rodir didanỽch ysprydaỽl o|vyỽyn* yn yr eneit.
Ac yn|y veint vỽyhaf y|dechreuho ysprydaỽl vryt
caffel blas ar|ỽybot idi e|hun. yn|y veint honno y
y*|tremycca knaỽdaỽl velyster. Ac velle pann vo bryt
dyn yn tangnouedus. Ac na chỽennycho dim byda+
ỽl odieithyr. Ac velle yspryt doethi neb a|gych+
ỽyn yn|y gallonn y|ardymheru y chỽant odieithyr.
Ac y|gyỽeiraỽ tangneued yndi e hun yny gynnvll+
her y medỽl ar bryt ar lyỽenyd ysprydaỽl myỽn
y gallonn. A herỽyd hynny y|dyỽedir yn|yr yeueg+
yl. Gỽyn eu byt y|rei tagnouedus yn|y callonnev.
kanys y rei hynny rac ỽyneb a gerir yn teyrnas
nef rac bronn crist arglỽyd lle y|mae lleỽenyd tra+
gyỽydaỽl heb tranc a heb orffenn. AmeN.
| « p 127v | p 128v » |