Oxford Jesus College MS. 119 (The Book of the Anchorite of Llanddewi Brefi) – page 34v
Ystoria Lucidar
34v
amlỽc yỽ nat oes eissev synnỽyr ar eneitev y
rei bychein kyt boet eissev gỽeithret. Paham
y|gelỽir y corff a|aner o gristonogaỽl hat ynn
vudyr. Am ry|gaffel o hat afulan. megys y
dyỽedir. pỽy a|dichaỽnn gwnneuthur yn lan
y|peth a|gaffer o|hat aflan. Ac yn lle arall y|dyỽ+
edir yn ennỽired ym caffat. i. pann lanhaer
dyn yn gỽbyl drỽy vedyd. Ac yn wir vot priodas
~ yn lan ac yn da. Paham y|dyỽedir vot yn vu ̷+
dyr hat hỽnnỽ. Dyn a|lanhaeir o|vewn. ac
odieithyr drỽy vedyd. Ac eilỽeith yd halogir
y|hat ef drỽy chỽant y knaỽt. pryt na|allo y
kymysc hỽnnỽ bot hep rwndỽal digrifuỽch.
Ac ny dichaỽn y|rith ny ffuryfhaỽyt etwa
gwrthỽynebu o|e ryeni. Pa|delỽ y|bydei aflan
hỽnnỽ na cherydus. O|bechaỽt adaf y|daỽ y
baỽp y kared hỽnnỽ yn kreu ev plant megys
o|dref tadaỽl dylyet. Ac am hynny y|byd ma+
rỽ paỽb yn adaf. Pa|delỽ y genir wyntev yn
vyỽ. Megys ot ymdengys dyn drỽy ffenestyr.
Ar aỽr honno kilyaỽ dracheuen. Velle dyn
a|aner megys ymdangos yr byt y|mae. Ac y
ymchỽelu dracheuen y|anghev yn|y lle. O|ma+
devir y|pechodeu drỽy y|bedyd yr ryeni. paham
y|bedydyir y|rei a|aner ohonunt yn vyỽ.
| « p 34r | p 35r » |