Oxford Jesus College MS. 57 – page 14
Llyfr Blegywryd
14
O|r|deila y penteulu neb a|wnel cam yng|kynted
y neuad. traean y dirỽy neu y camlỽrỽ a geiff ef.
Os is y kynted heuyt y deila yn gynt no|r distein
y traean heuyt a geiff. Y eistedua a vyd yn|y tal
issaf y|r neuad. a|r teulu y·gyt ac ef ar y ỻaỽ assỽ
idaỽ att y drỽs. Mab y|r brenhin neu nei idaỽ a
dyly bot yn benteulu. O|r gat y brenhin vn o|r
teulu ar uar y ganthaỽ hyt od·is y pentan. y
penteulu bieu y wahaỽd. a|e gynnal y·gyt ac ef os
mynn. ac ef bieu kymryt y henuryat a vynno
ar y deheu. ac araỻ ar y assỽ. March yn vossep
a|dyly y gan y brenhin. rann deuarch* o|r ebran a
D Jstein a vyd kyfrannaỽc ar y pe +[ geiff.
deir|sỽyd ar|hugeint yn|y ỻys. Rann deuỽr
a|geiff o aryant a|del gyt a|gỽestuaeu brenhina ̷+
ỽl. Pan rodho y brenhin sỽyd y vn o|r sỽydogyon
dieithyr y|r rei arbennic yn|ỻys. gobyr a|geiff y
distein ganthaỽ. nyt amgen pedeir ar|hugeint
o aryant. ac ef a geiff gan y penkynyd croen
hyd yn hydref y wneuthur ỻestri y gadỽ kyrn
| « p 13 | p 15 » |