NLW MS. Llanstephan 27 (The Red Book of Talgarth) – page 157v
Dylanwad y Lleuad
157v
meibyon ỽrth dysc. Pob peth o|r a|wnelych cryno vyd. ac
adeilyat melin a dỽyn dỽfyr. Y neb a ffoo ny cheffir. Pỽy
bynnac a syrthyo myỽn clefyt ebrỽyd y byd marỽ. neu
o vreid y dieingk. Mab o|r genir. ỻafuryus vyd a got.
o|r dieingk ynteu. kyuoethaỽc vyd. tỽyỻ y wlat a|wna.
Merch o|r genir. Pob peth o|r a wnel da vyd y hawyd.
da yỽ goỻỽng gỽaet y bore. Gỽers. Scitote quoniam mirificum
Y pymhet dyd o|r|ỻoer. na dyro dy lỽ. kanys anudon vyd
y ỻetrat a wneler a geffir. y neb a orwed·o. ebrỽyd y byd
marỽ. ny dylyir credu y vreudwytyon. nyt da goỻỽng
gỽaet. Gỽers. Nequs habitabit. ~ ~ ~
Y chwechet dyd o|r ỻoer. da yỽ hely. pob gỽeith o|r a|wne+
lych cryno vyd y dechreu. y ỻetrat a|wneler a|geffir. y neb
a aner. kelwydaỽc ac astut vyd. Merch a aner. diweir yn|y
heneint vyd. a hygar ym·pob peth. y neb a dygỽydo myỽn
clefyt hir y kỽyn. Gerth* vyd y breudỽytyon. na|dywet y
neb. nyt da goỻỽng gỽaet. Gỽers. Laboraui in gemitu meo.
Y seithuet dyd o|r ỻoer. da yỽ dofyaỽ aniueileit. pob ryỽ
uedeginyaeth cryno vyd. Y neb a|ffoo. ebrỽyd y keffir. a|r
ỻetrat a wneler a rodir drachefyn. Y cleifyon a vydant
iach o vedeginyaeth. Y mab a aner. caỻ ac estronaỽl ỻy+
thyraỽl a|charedic vyd. merch a|aner hi a|vyd da y ỻa+
uar. kerth vyd y breudỽytyon. Gỽers Exurge domine.
Yr wyth·uet dyd o|r ỻoer. da yỽ heu hendired. a symut
gỽenyn o le y le. Y ỻetrat a|wneler ebrỽyd y keffir. y mab
a aner adnabydus ac arderchaỽc vyd. o|r genir merch ỻys+
seid a diweir vyd. y breudỽyt o welych ef a|daỽ. O|r gỽely
| « p 157r | p 158r » |