Breudwd Welsh Prose 1300-1425
Cymraeg

NLW MS. Llanstephan 27 (The Red Book of Talgarth) – page 62r

Ystoria Adrian ac Ipotis

62r

1
hanffo o vreint a boned. ac a vo goludaỽc. Ym·adaỽ o·honaỽ
2
a|e olut bydaỽl. ac a|e digrifỽch knaỽdaỽl. a|hỽnnỽ a|geiff
3
ymossymeithaỽ yn|y nef. Dywet ym uab yr amheraỽdyr
4
os gỽdost. paham y mae iaỽnach unprytyaỽ duỽ gỽener no
5
diwarnaỽt araỻ o|r wythnos. Tri achaỽs ar|dec heb y mab.
6
kyntaf yỽ o·nadunt. duỽ gỽener y goruc duỽ adaf yn yr
7
ynys a|elwit ebron. ac a|e ỻunyaỽd ar y delỽ e|hun. yr eil yỽ.
8
duỽ gỽener y gyrrỽyt adaf ac eua o baradỽys y waelaỽt
9
uffern. Y trydyd yỽ. duỽ gỽener. y ỻadaỽd kain abel y vraỽt
10
y merthyr kyntaf a verthyrỽyt yr caryat duỽ. ac am hyn+
11
ny y cafas kain emeỻtith duỽ. Pedweryd yỽ. duỽ gỽener
12
y doeth gabriel angel yn|gennat att ueir pan disgynnaỽd
13
brenhin nef yn|y bru. a|chymryt knaỽt heb gyt gỽr. Y pym+
14
het yỽ. duỽ gỽener y bedydywyt iessu grist. Chỽechet yỽ duỽ
15
gỽener. y merthyrỽyt ystyphan uerthyr o gyngor erot greu  ̷+
16
laỽn. Seithuet yỽ. duỽ gỽener y ỻadỽyt penn ieuan uedyỽr*.
17
Wythuet yỽ. duỽ gỽener y diodefaỽd iessu ym|prenn croc yr ryd+
18
hau pobyl y byt o boeneu uffern. Naỽ·uet yỽ duỽ gỽener. y
19
diodefaỽd meir angeu. ac yd aeth y hyspryt att y hun mab
20
y lewenyd nef. Decuet yỽ. duỽ gỽener y diodefaỽd andreas
21
ar y groc. ac y|dywaỽt arglỽyd heb ef. ỻyma a|diodefaf|i yr
22
karyat arnat ti. vnuet ar|dec yỽ. duỽ gỽener y kafas elen lu+
23
ydaỽc y groc ry daroed y|r idewon y chudyaỽ yn|y daear o
24
achaỽs diodef o grist arnei. ac ar honno y diodefaỽd ynteu
25
gỽedy y dỽyn y vynyd caluarie trỽy enryded molyannus.
26
Deudecuet yỽ. duỽ gỽener. y merthyrỽyt pedyr a phaỽl ebostol.
27
Trydyd ar|dec yỽ. duỽ gỽener y ryd duỽ varnedigaeth. a|e draet.