NLW MS. Llanstephan 27 (The Red Book of Talgarth) – page 79v
Ystoria Adda ac Efa
79v
yr aỽr·honn. ef a vendigaỽd duỽ uab tec iaỽn ytti. ac yna y
ganet kain. a chalmana y chwaer. a|phan anet kain y
kyuodes ac y kymerth a|e|dỽylaỽ ỻysseu o|r daear ac a|e duc
yn|y laỽ. ac yna y gelwit ef kain. adaf a|gymerth eua a|e
meibyon ac a|e duc hyt y|dwyrein. Ac yna y kymerth duỽ
lawer o amryỽ hadeu. ac a|e hanuones gan uihangel y
adaf. ac y|dangosses idaỽ megys y|dylyei ỻauuryaỽ y dae+
ar. a|e thryỽanu. megys y delei ffrỽytheu o·honei. ac yd|ym+
borthynt ef a|e|lin ohonunt gỽedy hynny. Y bymhet vlỽy+
dyn gỽedy hynny y ganet abel. a delbora y chwaer. Yr abel
hỽnnỽ a vu y·gyt a|e vraỽt kain. Yna y dywaỽt eua ỽrth
adaf y harglỽyd. mi a gysgeis. a gỽeledigaeth a|weleis. bot
yn mab ni kain yn|tynnu gỽaet yn mab ni abel y vraỽt
a|e dỽylaỽ ac yn|y yuet. Yna y|dywaỽt adaf. truan y mae
arnaf|i ovyn maỽr y|ỻad kain abel. a gỽahanỽn ỽynt yr
aỽr·honn. a rodỽn wahanuỽyt udunt. ac yna y gỽahanys+
sant cain y lauuryaỽ y tir. ac abel yn vugeil. ac ueỻy y
gỽnaethant. ac eissoes ual y mynnaỽd duỽ ỽynt a|doeth+
ant y·gyt yỻ|deu y benn y mynyd y aberthu ac y|degemmu
herỽyd deduaỽl ossot hen·dedyf. ac edrych a|oruc yr argỽlyd
ar aberth abel. ac ny rengis bod idaỽ dim o aberth kain.
kanys yng|gỽrthỽyneb y vryt yd aberthei. A phan weles ka+
in nat edrychei yr arglỽyd ar y offrỽm ef. ennynnu a|oruc
o gynghoruynt a|ỻad abel y vraỽt. A phan weles adaf ỻad
o gain y vraỽt. arganuot a|oruc a|ry|dathoed o drỽc drỽy
y wreic ef. a thyngu a|oruc na|bydei dras y·rydaỽ a|hi vyth.
ac y|diofredaỽd ohonei deucant mlyned. ac eissyoes o gyme+
| « p 79r | p 80r » |