NLW MS. Llanstephan 27 (The Red Book of Talgarth) – page 83r
Ystoria Adda
83r
amser dauyd broffỽyt. a|dauyd a|rybudywyt o·blegyt yr ys+
pryt glan. ac a|erchit idaỽ mynet y arabia y vynyd thabor
y gymryt y teir gỽialen. ac eu|dỽyn y gaerussalem. ac yna
yd aeth dauyd y arabia. ac y deuth y vynyd thabor. ac yno y
kafas ef y teir gỽialen. ac y·gyt y kymerth ef ỽynt o|r dae+
ar. ac y doeth onadunt ryỽ arogleu anaỽd y neb gredu
y daet. megys y tebygei baỽp y vot yn uendigedic o eneu
duỽ. Ac yna y peris dauyd canu amryuael didanỽch o
gerdeu rac ỻewenyd. ac yd aeth y gaerussalem. a|r saỽl
a|delei att y gỽial o dynyon anafus. ac eu cussanu ỽynt
a eynt yn iach. A thrỽy y gỽial hynny y deaỻaỽd dauyd
mae ỽynt a|arỽydockeynt y drindaỽt lan. ac a|vydynt
defnyd y|r wir groc. ac y|duc dauyd ỽynt y gaerussalem trỽy
lewenyd maỽr. a medylyaỽ a|oruc pa|le diogelaf y gaỻei
ef eu plannu ỽynt. ac y dodes ỽynt y nos honno y myỽn
pỽỻ yn|y daear. kanys trannoeth y darparei ef eu plan*
ỽy yn ryỽ·le. ac y dodes gỽercheitweit y nos honno y
eu kadỽ ỽrth leuuer. Eissyoes nerth duỽ a|wnaeth y|r
gỽieil hynny gỽreidyaỽ yn|y pỽỻ hỽnnỽ yny yttoedynt
yỻ teir yn un prenn. a|r bore pan doeth y brenhin y kaf+
as ỽynt gỽedy gỽreidyaỽ ynghyt. a phan|weles ef yr an+
ryuedaỽt hỽnnỽ y|dywaỽt. Teilỽng iaỽn a chyfyaỽn yỽ
y mi eu hanrydedu ỽy o|m da i. Odyna y hedewis ef
yno ỽynt kan tebygei ef y vynnu o|duỽ eu|trigyaỽ ỽy
yno o achaỽs yr enryuedaỽd gỽneuthur y teir gỽialen yn
vn. Yno y bu y prenn hỽnnỽ yn tyfu deugein mlyned. ac
odyna y peris y brenhin dodi kylch aryant bob blỽydyn
| « p 82v | p 83v » |