NLW MS. 3035 (Mostyn 116) – page 127r
Brut y Brenhinoedd
127r
amgen. Rigyfarch. A|bolconi. A|ỻawin o botlan. A|phei byd+
hynt tywyssogẏon teyrnassoed yr oessoed a delhynt
hyt vraỽt. a enrydedynt eu molyant ac eu clot. Ac
eissoes pỽy bynac a|gyfarffei a hywel neu a gỽalchmei
oc eu gelynyon; ny diaghei a|e eneit gantaỽ. A gỽedy
eu dyuot megys y dywespỽyt vchot hyt ym|plith bydin
yr amheraỽdyr yn damgylchenedic oc eu gelynyon
y|syrthasant y|trywyr hẏnẏ Ac ỽrth hyny hywel a gỽalch+
mei y|rei ny magyssit yn yr oessoed kyn noc ỽynt neb
weỻ noc ỽynt. Pan welsant yr aerua oc eu ketym+
deithon. Yn ỽychyr y|kyrchassant|hỽynt ac yman vn
o pop parth yn kyfrydec Ac yn dywalhau ac yn blinaỽ
bydin yr amheraỽdyr Ac megys ỻucheit yn ỻad a|gyf+
arffei ac ỽynt. Ac yn annoc eu ketymdeithon. A|gỽalch+
mei yn damunaỽ o|e hoỻ dihewẏt ym·gaffel a|ỻes am+
heraỽdẏr y gymeỻ arnaỽ peth a|digonei y|milỽryaeth
Ac nyt oed haỽd barn pỽy oreu ae hywel ae gỽalchmei.
A C odyna gỽalchmei a|gafas y damunedic hynt.
Ac yn ỽychyr kyrchu yr amheraỽdyr a oruc a gos+
sot arnaỽ Ac eissoes ỻes megys yd oed yn dechreu
blodeu deỽred y ieuenctit Ac yn vaỽr y ynni. nyt oed
weỻ dim gantaỽ ynteu noc ym·gaffel a|r ryỽ varchaỽc
clotuaỽr hỽnnỽ. yr hỽn a gymheỻei y ỽybot beth vei
y angerd a|e deỽred Ac ỽrth hyny diruaỽr lewenyd a
gymerth yndaỽ ỽrth ym·gahel o·honaỽ a gỽr kyn|glot+
uorusset a gỽalchmei. Ac ymerbyneit yn galet a wna+
eth pop vn a|e gilyd. Megys na welat rỽg deu vilỽr
ymlad a|geffelypei idaỽ A|phan ytoedynt ỽy yn ne+
widyaỽ kaletyon dyrnodeu A|phob vn yn ỻafuryaỽ
agheu y gilyd. Nachaff y rufeinwyr yn ympentyryaỽ
| « p 126v | p 127v » |