NLW MS. 3036 (Mostyn 117) – page 143
Brut y Brenhinoedd
143
1
y troir y vaỽt yn yr oleỽ. y chwechet a diwreidha muroed
2
iwerdon. A|e llỽyneu a|symut yn wastatrỽyd. Amryua+
3
lyon ranneu a dỽc yn vn. Ac ym pen y lleỽ y|coronheir.
4
y dechreu a darestỽg y whibiander. diheỽhyt y diwed
5
hagen a eheta ar oruchelyon. kanys atnewydhaa
6
eisteduaeu y|guynuydedigyon trỽy y guladoed. Ac a
7
leha bugelyd yn lleoed guedus. Dỽy gaer a|wisc o dỽy
8
vantell. A guerynolyon rodyon a|ryd y werydon. Ody+
9
na y gobryn canmaỽl yr holl gyfoethaỽc. Ac y·rỽg y
10
guynuydedigyon y kyfleheir. O hỽnnỽ y kertha y
11
linx a erchyruynha pop peth. yr hỽn a ymdywynic
12
yn gỽymp y priaỽt genedyl. Trỽy hỽnnỽ y kyll flan+
13
drys y|dỽy ynys. Ac o|e henteilygdaỽt* yd yspeilir. Ody+
14
na yd ymhoelant y kiỽtaỽtwyr yr ynys. kanys aball
15
yr estraỽn genedyl a dỽyrhaa. yr hen guyn y ar varch
16
guelỽ yn diheu a trossa auon perydon. Ac a guyalen
17
wen a uessur melin arnei. Katwaladyr a eilỽ ky+
18
nan. Ar alban a dỽc yn|y getymdeithas. yna y byd aer+
19
ua o|r estraỽn genedyloed. yna y lithrant* yr auonoed
20
o|waet. yna y llawenhaant myneded llydaỽ. Ac o|r
21
teyrnwyalen y|coronheir y brytanyeit. yna y llen+
22
wir kymry o lewenyd. A chedernyt kernyỽ a irhaa.
23
O enỽ brutus yd enwir yr ynys. Ac enỽ yr estrony+
24
on a aballa. O gynan y kertha baed ymladgar. yr
25
hỽn a diwhyllya blaenwed y danhed o vyỽn llỽyneu
26
freinc. kanys trecha pop kedernyt mỽyhaf. yr rei
27
lleihaf hagen y ryd amdiffyn. Hỽnnỽ a ofynhaant
| « p 142 | p 144 » |