NLW MS. Peniarth 11 – page 212v
Ystoriau Saint Greal
212v
ac ỽynteu a edrychassant ar baredur. Ac a|vu ryued ganthunt
pa vod y dathoed ef y myỽn. Ny dywedassant ỽynteu vn geir ỽrth+
aỽ ef. rac meint y credynt y|r|dryc·yspryt a|oed yn|y tỽr. A phỽy
bynnac a vynnei eu ỻad ỽy. nys didorynt ỽy. kanys credu
yd oedynt vot eu heneidyeu yn|iach drỽy eu gỽangret. ac ny
wydynt ỽy vot amgen gret yn|y byt no hynny. Y·gyt a|hyn+
ny. ny wydynt dim y ỽrth nerth arueu. ac nyt oed reit udunt
rac cadarnet oed y casteỻ. Y·gyt a|hynny heuyt yd oed y kyth+
reul yn roi yno amylder o bop da o|r a vei reit ỽrthunt. ~
Pan weles paredur na mynnynt ymdidan ac ef. ef a|aeth y|r
neiỻ hanner ac a|e gelwis ỽynteu yn|y gylch. a rei onadunt a
doeth attaỽ. ereiỻ ny doethant. Ac yna y ỻef a|erchis y paredur
peri udunt vynet drỽy y porth. ac yna ef a welei pỽy a vynnei
gredu y duỽ onadunt. Yna paredur a|dynnaỽd y gledyf ac
a|e gyrraỽd o|e vlaen tu a|r porth. a|r neb ny mynnei uynet y|r
porth nys eiryachei baredur ef. ac ueỻy ny dienghis yr
vn o|r deudec a phump cant namyn tri ar dec heb eu ỻad o|r
gỽyr elydyn. a|r rei hynny a gredassant y duỽ. A|r dryc·yspryt
a|oed yn|y tỽr a|difflannaỽd ymeith megys meỻden. a|r|daear
a|lyngkaỽd y tỽr hyt na welit dim ohonaỽ. gỽedy hynny ỽ+
ynt a barassant kyrchu meudỽy y|r fforest o|e bedydyaỽ. a|bỽ+
rỽ kyrff y rei meirỽ ymeith. a|r meudỽy a|e bedydyaỽd ỽy
a|elwit denis. a|r casteỻ a|elwit y casteỻ profadỽy wedy hynny.
yno y buant ỽy yny daroed y|r gret newyd dyuot y bop ỻe yn
yr ynys. ac yn buchedockau megys seint heb aỻel o neb dy+
uot attunt o·ny bei gristaỽn creadỽy. A gỽedy kymeỻ o+
| « p 212r | p 213r » |