NLW MS. Peniarth 11 – page 259v
Ystoriau Saint Greal
259v
am glybot clot laỽnslot yn mynet dros baỽp. a|bot laỽnslot yn
etiued o|e dat. Ac yna brenhin claỽdas a|anuones kennat di+
warnaỽt att briant y erchi idaỽ os gaỻei erchi a|pheri y ar+
thur roi kennat y laỽnslot y vynet ymeith y ỽrthaỽ. ac ynteu
a|dalei idaỽ dros y lauur. ac a|e kymhorthei gỽedy hynny o
gymryt dial gan y elynyon. Kanys pei laỽnslot ef a gỽalch+
mei a|veynt odieithyr y ỻys. nyt oed ovyn y ỻeiỻ. ac ueỻy y
geỻynt ỽy gaffael eu hewyỻys ar y|wlat. Briant ynteu a
anuones y gennat drachevyn at vrenhin claỽdas. y dywet+
ut idaỽ nat yn|y ỻys na|gỽalchmei nac owein na ỻawer o|r ̷
ỻeiỻ. ac am|hynny erchi idaỽ na russyei dyuot pan y myn+
nei. ac ynteu a|wnaei y laỽnslot yn|dieu adaỽ y|ỻys yn ehegyr.
C Hwedleu a|doeth y lys arthur ry daruot y laỽnslot. lad
brenhin orient. a|distryỽyaỽ y bobyl a|e|ỻad. ac ody+
na y vynet y wlat y vrenhin a|e henniỻ oỻ. a|pheri y|r bo+
byl rac ovyn eu|hangeu gredu y|r wir|groc. ac y gret grist. Bri+
ant yna ny bu lawen ganthaỽ dim o|r chwedleu hynny. ac
ef a|doeth diwarnaỽt att arthur yn|dirgel. ac a|dywaỽt. ~
Arglwyd heb ef mi a|dylyaf dy rybudyaỽ a gỽrthlad dy geỽ+
ilyd a|th goỻet y ỽrthyt. kanys ti a|m gỽnaethost yn ystiw+
art ar gỽbyl o|th vrenhinyaeth. ac am hynny yd ỽyf yn tyby+
eit bot gennyt ymdiryet maỽr ynof|i. ac am hynny ny dy+
lyaf|inneu vot yn|vn a|gỽneuthur y|ttitheu afles. a|mi a ̷
dylyaf dy anrydedu a|gỽeỻau dy anryded. yn oreu ac y gaỻỽyf.
| « p 259r | p 260r » |