NLW MS. Peniarth 12 part ii – page 39v

y gỽelir y corff a|aner o gristonogaỽl hat yn vudyr. Magister Am y ry

gaffel o hat aflan. megys y dywedir. Pỽy a|dichaỽn gỽneuthur

yn lan y peth a gaffer o hat aflan. ac yn|ỻe araỻ y|dywedir. yn

enwired y|m kahat i. discipulus Pan lanhaer dyn yn gỽbyl drỽy vedyd

ac yn wir vot priodas yn|lan ac yn|da. paham y dywedir bot

yn vudyr yr hat hỽnnỽ. Magister Dyn a|lanheir o|vyỽn ac odieithyr

trỽy vedyd. ac eilweith yd halogir y hat ef trỽy chwant y cnaỽt

pryt na aỻo y kymysc hỽnnỽ bot heb rỽndwal digrifỽch.

ac ny dichaỽn y rith ny ffuryfhaỽyt etto gỽrthỽynebu o|e ri+

eni. discipulus Pa delỽ y bydei aflan hỽnnỽ na cherydus. Magister O bechaỽt

adaf y daỽ y baỽp y kared hỽnnỽ yn creu eu plant megys

tref·tadaỽl dylyet. ac am|hynny y byd marỽ paỽb yn adaf. discipulus

Pa|delỽ y genir ỽynteu yn|vyỽ. Magister Megys ot ymdengys dyn

drỽy ffenestyr. a|r aỽr|honno kilyaỽ dra|e|gevyn. veỻy dyn a

aner megys ymdangos y|r byt y|mae. ac ymchoelut dra|e|ge+

vyn y angeu yn|y ỻe. discipulus O|r madeuir y pechodeu drỽy y bedyd

y|r rieni. paham y bedydyir y rei a|aner ohonunt ỽynteu yn

vyỽ. Magister O|r gỽenỽynir pastei. ef a|vyd gỽenỽynaỽl y bara a

phob peth o|r|a|del o·honei. veỻy y bu adaf yn beỻen lygredic.

a|phaỽp o|r a|anet o·honaỽ a|lygrỽyt o bechaỽt pei na wnelit

yn vyỽ trỽy vedyd yn angeu y prynaỽdyr. a megys y glan+

heir y rieni drostunt e|hunein yn|y bedyd. veỻy y mae reit at+

newydu y plant drostunt e|hunein yn|y dedyf drỽy angeu

crist. megys y dywedir. Paỽb a|wneir yn vyỽ yng|krist. discipulus

Paham na at duỽ y rei dyuot y|r byt y gaffel bedyd. neu

paham gỽedy y ganer y dỽc duỽ ỽynt o|r byt kynn eu be+

dydyaỽ. Magister Brodyeu dirgeledic o achaỽs yr etholedigyon ha+

gen