NLW MS. Peniarth 190 – page 110
Ystoria Lucidar
110
eu kyrff drỽy wylaỽ ac unprydyaỽ a ỻauur+
yaỽ. Y ereiỻ y byd purdan o goỻi eu kened+
yl ac eu da. Y ereiỻ o heint a dolur. Y ereiỻ
o eisseu bỽyt a|diỻat. Y ereiỻ o odef agheu
chwerỽ. Gỽedy angheu y byd purdan yr e+
neit. ac o ormod gwres y tan. ac o ormod
gryuachedigaeth oeruel. ac o amryỽ boe+
neu ereiỻ. a mỽy yỽ y boen leihaf ohonunt
no|r boen vỽyaf a|allei dyn yn|y byt hỽnn
y vedylyaỽ. a|thra vont hỽy yn|y poeneu
hynny. gỽeitheu yd ymdengys engylyon
neu seint ereiỻ udunt y gỽnaethant ỽyn+
teu enryded udunt ac ỽynt yn vyỽ yn|y
byt hỽnn. ac a vyryant awel nefaỽl ac
arogleu hynaỽs arnunt neu ryỽ solans
yny vont ryd y vynet y|r neuad ny chym+
er vn mann yndi. discipulus Ym pa ryỽ ffuryf y
gossodir ỽynt yno. Magister|Yn ffuryf y corfforoed
y buant yman. ac ef a|dywedir am y die+
vyl y rodir udunt corfforoed o|r awyr o|e
poeni yndunt. discipulus|Pryt na|synnyo corff dim.
ac na aỻo gỽneuthur dim drỽydaỽ e|hun.
| « p 109 | p 111 » |