NLW MS. Peniarth 32 (Y Llyfr Teg) – page 28
Llyfr Iorwerth
28
gyt a|distein y brenhin. vn naỽd. ac vn|werth. ac vn
sarhaet yỽ a|choc y brenhin. Wythuet yỽ canhỽyỻ+
yd y vrenhines. Ef a|dyly y dir yn ryd a|e varch a|e wisc.
ef a|dyly rann o aryant y gỽynos. Ef a|dyly
dyrnued o bop kanhỽyỻ o|r a|dalyo yn|y|dỽrn. Ef
a dyly a dynho a|e danned o|r canhỽyỻeu. Ef a dyly
gỽediỻ y canhỽyỻeu oỻ. Ef a|dyly y briỽ·vara a|r
briỽ·diuynyon a|el dros dysgyl y vrenhines. vn naỽd ac
un letty. ac vn sarhaet. ac vn werth yỽ a chan+
hỽyỻyd y brenhin. Uchot y traethassam ni o|r
pedwar sỽydaỽc ar|hugeint a berthyn ar y ỻys.
yman y traethỽn o|r sỽydogyon aruer a vydant
K Yntaf yỽ onadunt y gỽastra +[ yn|y ỻys.
ỽt avỽyn. Ef a|dyly y dir yn ryd. a|e varch
pressỽyl. a|e wisc megys y ỻeiỻ. Ef a|dyly capa+
neu glaỽ y brenhin. y marchocco yndunt. a|e hen
frỽyneu. a|e hen hossaneu. a|e hen ysparduneu.
a|e hen|gyfrỽyeu eurgalch. a|e hoỻ ystarn. Ef a
dyly bot ympob ỻe dros y pengỽastraỽt yn|y
apsen. Ef a dyly daly gỽarthafyl y brenhin. pan
esgynno. a|phan disgynno. a dỽyn y varch y|ỽ
letty. a thrannoeth y dỽyn idaỽ. Ef a|dyly ker+
det yn|gyuagos y|r brenhin. yn wastat ỽrth y was ̷+
sanaethu pan vo reit. Ef a dyly pedoli meirch
y brenhin. Y letty yỽ ygyt a|r pengỽastraỽt. Ef a
dyly kyweiryaỽ march yr ygnat ỻys. a|e|dỽyn
| « p 27 | p 29 » |