NLW MS. Peniarth 32 (Y Llyfr Teg) – page 57
Llyfr Iorwerth
57
Nyni a dywedỽn dygỽydaỽ y gỽystyl hỽnnỽ a|e
uot yn|dilis. O deruyd. y|r mach rodi peth maỽr yg|gỽ+
ystyl peth bychan. kyfreith. yỽ y|r haỽlỽr kymryt yr
hynn a rodher idaỽ yg|gỽystyl. a chyt coỻo hỽn+
nỽ kynno|r oet; ny diỽc ef namyn y traean dra+
chefyn. y|r mach a|e rodes attaỽ. Y mach hagen
a|e|diỽc yn gỽbyl y|r kynnogyn. kanys agkyfreithaỽl
y duc. O|deruyd. bot mach ar deudec keinhaỽc. ac
nat oed ar helỽ y kynnogyn namyn march a
dalei dec punt. a|dyuot y mach a|r haỽlỽr y gym+
meỻ y deudec keinyawc. a|dywedut o|r kynnogyn. nyt
oes gennyf|i a|dalỽyf y chỽi namyn vy march. a
hỽnnỽ ny|s|talaf ac ny|s gỽystlaf. ny dyly y mach
yna dỽyn gỽystyl arnaỽ ef. ac ny dyly yr haỽlỽr
dỽyn gỽystyl y mach. namyn kyrchu yỻ deu
y|r arglỽyd y venegi idaỽ nat oes racco namyn
peth maỽr. ac na dylyir dỽyn peth maỽr yg|gỽ+
ystyl peth bychan. ac yna y mae iaỽn y|r arglỽ+
yd rodi kenhat y|r mach y rodi y peth maỽr yg
gỽystyl y peth bychan rac bot yn|goỻedic y|r
haỽlỽr. O|deruyd. y dyn rodi mach y araỻ ar beth. a
gỽedy rodi y mach; mynet y naỽd rac y dylyet.
nyni a|dywedỽn na dyly ef naỽd rac hynny. ac
y dyly y mach rodi gỽystyl y|r haỽlỽr. neu ynteu
a|watto y vechni. Ny|dyly neb kymryt mach yn
vn·dydyaỽc. kanys o·ny|s haỽl yn|y dyd hỽnnỽ;
| « p 56 | p 58 » |