NLW MS. Peniarth 35 – page 79v
Llyfr Iorwerth
79v
lyet ar y gwellt a uo yndaỽ ual ar yr yt
kany dylyir gwellt paỽr yna. Ny dy+
ly neb gwellt kadỽ amgen ar deu wellt. kae
a| gweirglaỽd. Ac o myn y kadỽ kymeret
kroes yr arglỽyd a chatwet honno ef;
Val hyn y dylyir daly ysgrybyl gwyllt. ~
y myỽn buarth allan. Ac ysgrybyl dof
y myỽn ac allan eu gwarchae. Ac o byd
ysgrybyl y deudyn na chymysger. Ac o|r
byd amryỽ. Na chymysker. Ac o dodir y+
gyt. rỽymher pob rei o·nadunt. [ y moch
nyt iaỽn eu rỽymaỽ namyn y gwarchae.
Ieir a| gỽydeu. iaỽn yỽ eu rỽymaỽ yn eu
O deruyd y dyn erchi gỽystyl [ daly. ~
ar yt ar oet dygỽyd. Ny dyly y rodi namyn
ar vystyl yt. Ac gỽystyl yt ny dygỽyd
hyt kalan gayaf. Pvy| bynhac a| dylyo
yt ar uach a|e am lỽgỽr ysgrybyl y kyn+
hayaf. A|e o prynu ac na|s gouynho hyt
kalan gayaf. Nys dyly. Sef achos na|s
dyly. vrth y uynet yn tymmor nat iaỽn
y ouyn Canyt iaỽn gouyn yt y ulỽydyn
yn| y gilyd. Pvy| bynnac a dalho ysgry+
byl ac y ar y| daly ef gỽneuthur kyflaf+
an. Pa kyflauan bynhac uo y deilat
| « p 79r | p 80r » |