NLW MS. Peniarth 36B – page 18
Llyfr Blegywryd
18
dyuot colledic a manacỽr gyt ac
ef a|tygho yn erbyn arall klybot a
gỽybot arnaỽ y lletrat. Eil yỽ tygu
or manacỽr gỽelet a|gỽybot arnaỽ
y lletrat. a hỽnnỽ a ellwir* lliỽ. Try ̷+
dyd yỽ lludyaỽ rac dyn geissaỽ da
a gollassei yn lle y typpyei y vot.
Ny dyly neb rodi reith gỽlat am let ̷+
rat heb vn or manageu hynny yn|y
erbyn onyt pallu a|wna o rodi llỽ
gỽeilyt y golledic. or palla; nyt reit
manac arnaỽ namyn hynny. y
gymhell reith gỽlat y gantaỽ. Or
gỽedir haỽl a|defnydyer o amryfal
achỽysson trỽy vn reith a|perthyno
ỽrth yr achaỽs mỽyhaf o·honei y
gỽedir yr haỽl oll. kanys pob vn
haỽl vn* reith a dyly yny gỽatter.
Pỽy bynhac or kynhenusson yn*
a el yn erbyn datgan y braỽtỽr
| « p 17 | p 19 » |