NLW MS. Peniarth 46 – page 258
Brut y Brenhinoedd
258
yn ymlad. gyt a|rei kynntaf y llas gorleis.
ac y gỽasgarỽyt y|lu. ac y caffat y castell.
a|r da|oed yndaỽ. nyt ryỽ ỽ unyaỽn goelbrenn
y|rannỽyt. namyn herỽyd deỽred paỽb yn|y
gribdeilaỽ. ac odyna y|deuthpỽyt y|uenegi
y eigyr yr lad yr iarll. a|r cael y|castell. a|phann
ỽelas y kennadeu y|brenhin yn|drych gorleis
yn eisted ger llaỽ y iarlles kyỽilydyaỽ a|ỽn+
aethant yn uaỽr. a ryuedu yn uỽy no|dim
ỽelet yno o|e|blaen y|gỽr yd oedynt yn dyỽe ̷ ̷+
dut y lad. a|phann gigleu uthur|benndragon
hynny. chỽerthin a|ỽnaeth ef. a|dyỽedut ual
hynn. Dyoer hep ef arglỽydes ny|m llas i et+
tỽa. ac eissoes dolur yỽ gennyf caffel uyg
castell a|r lad uy|gỽyr. ac ouyn yỽ gennyf
dyuot y|brenhin ar yn penn ninheu a|chael
y castel hỽnn heuyt. a|n cael ninheu yndaỽ
ef. a mi a|af yn eỽyllys y|brenhin rac kyuar+
uot a|uo gỽaeth no hynny a|ni. ar ar* hyn+
ny kychỽyn a|oruc y|brenhin a|mynet at
y|lu a|bỽrỽ drych gorleis y|arnaỽ. a|mynet
yn|y drych e|hun. a|doluryaỽ yn uaỽr a|oruc
| « p 257 | p 259 » |