NLW MS. Peniarth 8 part i – page 38

nawch panyw bychan a dal y ffyd ay dedyf y gristyawn hep

weithredoed da oy gwpplav. Mal y|dwawt yr ysgrythur. Me  ̷+

gis y|may marw korff hep yr eneit. yuelly y|may marw ffyd yndi e

hvn hep weithredoed da. Megis y|gwrthodes y|brenhin pagan

bedyd yuelly y|may ovyn tua* bo frwythlawn y|uedyd y|gristy  ̷+

awn ny chwpplao o|weithredoed gyt a|chredu oy gallon. [ Val

Odyna drannoeth y|doethant o|bob [ y|llas aygolant

parth ar vedwl ymlad ar yr amvot y|dywedessynt vchot

Sef rivedi a|oed yn llu cyarlymaen pedeir mil ar dec arr|u  ̷+

geint a|chant. A chann mil a|oed y|aygolant. A|phedeir by  ̷+

din a orvc y|cristonogyon. A phymp bydin a|orvc y|sarasscinyeit

Ar vydin gyntaf onadunt a|gyuarvv ar kristonogyon a|las

oll. Ac odyna y|dyvv yr eil vydin a honno heuyt a las oll. A|ph  ̷+

an weles y|sarasscinyeit hynny ymgynnvllaw a orvgant a|rodi

aygolant yn ev perued. A|phan weles y|cristonogyon hynny

ev gogylchynv a orvgant. Ac or neill tv vdunt yd oed ernalld

de belland ay lu. Ac or parth arall yd oed stultus ay lu. Ac or

tu arall yd oed arangvs vrenhin ay lu. Ac or parth arall vd  ̷+

unt yd oed cyarlymaen ay dywyssawc ymladev ac eu bydin

oed yn dodi gawr ar ev kyrn eliffeint yn dvhvn wrawl ac

yn kythrudaw y|sarasscinyeit oc ev trydar. A|chan ymdiryet yn

duw ev kyrchv a|oruc y|cristonogyon vdunt. A|dechrev ev llad

ac eu distriw yn wychyr. A|chyntaf y|kyrchws ernallt de belland

wynt ef ay lu. Ac ef a|bwryws a|gyvarvv ac ef o|bob tv idaw.

yny doeth yr lle yd oed aygolant. A|phan doeth yg kedernyt

y|niver y|lladawd ernallt y|benn. A chwynvan vawr a|vv

yna a|chythrudaw y|sarasscinyeit yn wy* no|meint. Ac ny die  ̷+

ngis odyna onadunt namyn brenhin sigil a|gorvcheluaer

cordubi Ac ychydic o niver paganyeit a|ffo a orvc hynny on  ̷+

adunt. Ac nyt oed anydyfnach y|gwaet vdunt yn eu hymlit

noc y|deuej yr bvdugolyon hyt ym bras ev hesgeiryev. Ac a

odiwedassant or sarasscinyeit yn|y gaer a ladassant oll. A|llyna

val y|gorvv cyarlymaen ar aygolant o|amvot ragorj y|dedyf